hashimik eqqussineq
Hashimik eqqusseriarluartup juulli annaateriaraluaraa
Angut 60-nik ukiulik Esbjergimiu decemberip qaammataani hashimik 800 grammimik tigummiartoq Kangerlussuup Mittarfiani tigusarineqarpoq.
Hashimik eqqusseriarluartoq Esbjergip eqqartuussivianeeqqammerpoq, tassani suna pissutigalugu hashimik eqqusseriarluarsimanini nassuiaatigisimavaa.
- Juullisiornissarput annaateriaraluarpara. Ukiut arfinillit matuma siorna kilisaammi inuttaatillunnga qitinnik ajoqusernerma kingorna aningaasaateqanngilagut. Pisortanit ikiorsiissutit isumalluutigaakka, taamaammat haship annersaata Kalaallit Nunaanni tuniniarneratigut aningaasanik iluanaarniaraluarpunga, angut 60-inik ukiulik, aviisi JydskeVestkysten aallaavigalugu taama oqarpoq.
Angut arlaleriarluni Christianiamut pisiniartarnermini hashi katersarisimavaa, taassumali hashimut 800 grammimik oqimaassusilimmut aningaasartuutigisimasani 30.400 koruunit Nunatsinni 200.000 koruuninik isertitsissutiginissai naatsorsuutigisimangaluarlugu.
JydskeVestkystenilu aallaavigalugu angut eqqartuunneqarsimanngilaq, 808-millu misissuiffineqaqqaassaaq, tassani angutip pineqaatissiineqanngikkallartumik eqqartuunneqarsinnaanera naliliffigineqassalluni. Piumasaqaatitaqanngitsumillu isertitsivimmiitinneqarnissaa unnerluussisussaatitaasup piumasaraa.