ataatsimiititsinerit
Hashimik atornerluineq pillugu oqallitsitsiniartut
Peqqissutsimut aalakkersuisoq, Doris Jakobsen, Ilaqutariinnermut Peqqissutsimullu ataatsimiititaliaq Qaqortumi Narsamilu innuttaasunik ataatsimiisitseqatigiipput. Pingaarnertut hashi pillugu ajornartorsiutit oqallisigineqarnissaat anguniarneqarsimavoq
Nunatsinni hashimik atornerluineq annertuvoq, minnerunngitsumillu kujataani annertoorujussuarmik ajornartorsiutaavoq.
Innuttaasunik misissuisitsinermi 2014-imeersup ersersippaa, angutit inuusuttut 31 procentii 18-it – 24-illu akornanni ukiullit akulikitsumik atuisartut, minnerpaamik qaammammut ataasiarlutik.
Ataatsimoorluni aaqqiivigineqassasoq
Taamaammat peqqissutsimut naalakkersuisoq, Doris Jakobsen (S), Ilaqutariinnermut Peqqissutsimullu ataatsimiititaliaq peqatigalugu Qaqortumi Narsamilu innuttaasunik ataatsimiisitseqatigiipput.
Pingaarnertut hashi pillugu ajornartorsiutit oqallisigineqarnissaat anguniarneqarsimavoq minnerunngitsumillu nunap immikkoortuani unammilligassat imaannaanngitsut hashimik ajornartorsiuteqarneq anigorniarnissaanut kujataani innuttaasunit oqaaseqaatinik naleqarluartunik pissarsinissaq siunertaasimavoq.
- Hashi pillugu ajornartorsiut massakkorpiaq aalajangiusimanngikkutsigu kinguaariit tulliuttut annertuut annaassavavut. Taamaammat Inatsisartut Ilaqutariinnermut Peqqissutsimullu ataatsimiititaliaat annerusumik suleqatiginiarpavut ajornartorsiutit qaangerniarlugit. Hashimik atornerluineq ataatsimut akiorniarparput pinaveersimatinniarlugulu, Doris Jakobsen oqarpoq.
Agguaqatigiisillugu annertunerusoq
Innuttaasunik misissuinerup aamma ersersippaa kujataani hashimik pujortartarneq annertoorujussuarmik atorneqartartoq tassa innuttaasut 18,5 procentii akulikitsumik hashimik pujortartarlutik.
Tamanna immikkuullarissumik qaffasinneruvoq nunap sinneranut sanilliullugu tassani angutit 16 procentii arnallu 9 procentii atuisuullutik.
Doris Jakobsenip Campus Kujalleq Qaqortumiittoq pulaarpaa inuusuttunillu hashimik ajornartorsiorneq sammillugu. Tassanilu soqutiginninneq aamma annertusoq, Namminersorlutik Oqartussat ilisimatitsipput, inuusuttullu isumassarsianik pitsaalluinnartunik tunniussaqarput hashimik atornerluineq pinaveersimatinniarlugu.
Atuaruk: Meeqqat illersuisuat aarlerisaarivoq: Meeqqat qulinik ukiullit ikiaaroortarput