Hash
Hashimik anngiortumik tunuuliaqutaasut sumi tamaani ujartorneqartut
Tunuliaqutaasut ikiortaallu malersorneqarput. Oqartussaasut nutaanik suliniuteqarniarlutik pilersaarput: »Siunissami akileraaruserisut tamakku allaffiisa silataanniinnerullutik najuunnerusalissapput,« anguniaaraat.
Hashimik anngiortumik eqqussuisartut tunuliaqutaallu nakkutigineqarnerlernissaat Akileraartarnermut aqutsisoqarfimmi kissaatigineqarpoq. Suliniutillu annertussapput. Tassa politikerit aningaasat pisariaqartinneqartut akuersissutigissappatigit. Ima annertutigissapput allaat pinerluttut silarsuaanni sajuppillatsitsisinnaallutik.
AG taama allappoq.
Pilersaarutit Aningaasaqarnermut Naalakkersuisoqarfimmit allakkiami allassimapput, taakkulu Inatsisartut Inatsisinik atortitsinermut ataatsimiititaliaani suliareqqullugit noqqaassutigineqarsimapput.
Allakkkiaq ilaatigut Akileraartarnermut aqutsisoqarfimmi kissaatigisanik allattukkanik imaqarpoq. Tassani sulisut piginnaanngorsarneqarnissaat, teknikkikkut atortunik nutaanik pisiortornerit, nunani eqqaamiorisani suleqatigisanik qaninnerusumik suleqateqarsinnaanerit - minnerunngitsumillu – akileraaruserisut qimmillu aangajaarniutinik ujaasisartut amerlisinneqarujussuarnissaat eqqaaneqarput.
Immikkoortoq pingaarutilik tassaavoq illoqarfinni nakkutilliisunik amerlanerusunik sulisoqalernissaq, tamakku akuttunngitsumik sinerissami sulillutik illoqarfiit nunaqarfiillu nakkutilliiartorfigisarsinnaavaat.
Ullumikkummi aanngajaarniutinik eqqussuisartut tamaasa tigusarinissaannut nakkutilliinerit suli taama pitsaatigilinngillat, tassami anngiortumik eqqussuisartut periutsiminnik nutarteriujartarmata – isertitatillu amerlisittarlugit.
Aningaasaqarnermut aqutsisoqarfimmit allakkiami nakkutilliinerit ullumikkut naammattumik sunniuteqanngitsut Naalakkersuisut nassuerutigaat. Taamaattumik anngiortumik eqqussuisartut ajornanngitsunnguamik nioqqutissaatitik nunami siammartersinnaavaat.
- Akileraartarnermut aqutsisoqarfimmi sulisut nakkutilliillutik sulinerminni Kalaallit Nunaata isorartunerussua akornutigaat. Taamaattumik akileraartarnermut aqutsisoqarfimmiut angalalluarsinnaanerunissaat pingaaruteqarpoq. Nuup avataani akileraaruserisut allaffiinik pilersiortitsinerit angalasinnaanernut iluaqutaassatut allakkiami allassimavoq.
Allakkiami aamma suliniutissat arlallit pilersaarutaapput, taakku AG pisiaralugu atuarsinnaavatit: