Hashi pillugu suliaq: Ilisimaneqanngitsunik anginerusunik tunuliaqutaasoqarsinnaasoq

Hashi pillugu suliarujussuarmut atatillugu suli ilisimaneqanngitsumik tunuliaqutaasoqarsinnaasoq, unnerluussisup Tobias Bergip mattunnianngilaa

Ullumi marlunngornermi 29-nik ukiullip pingaarnertup pasisap eqqartuussivimmi ini 5-imut ingiaqatigisaanut politiinut ikinngutinnersumik oqaaseqarnissamut inissaqartitsisoqarpoq. Tamatigut politiinut taama eqqissisimatigisumik atassuteqarneq ajoraluarpoq.

Taanna 29-nik ukiulik ukiuni marlunni hashimik 58,5 kiilunik anngiortumik Nunatsinnut eqqussuinermik aqutsisutut unnerluunneqarpoq. Ullut qulit matuma siorna unnerluussisup Tobias Bergip suliamik ingerlatsinermini siullermi nassuiaatigaa, tamanna suliaq iluliarsuup nuuginnaatut annertussusilik qulaajarneqarsimasutut nalilerlugu. Politiit uppernarsarsinnaanngisaat pineqarsimasinnaalluni.

Ataatsimut isigalugu unnerluutigineqartut arfineq-marluk minnerpaamik 16 millionit koruuninik iluanaaruteqarsimassasut, unnerluussisoq isumaqarpoq. Taakkunannga 4 millionit koruunit angummit tunuliaqutaasorisaminit arsaarinnissutigineqassasut isumaqarpoq.

Aningaasat sumiippat?

Unnerluutigineqartoq taanna ilaqutariinni ilungersorluni sulisutut imminut oqaatigivoq, pinngitsuullunilu hashit kunngiattut saqqummiunneqarnerarluni. Taamatut isiginninnermut tapersiilluni taassuma illersuisua, Miki Lynge, suliamik ingerlatsinermini pisuunermut apeqqusiivoq, illersugaatalu inooriaasiani hashimik tuniniiaanikkut millionillikkaanik iluanaaruteqarsimaneranik takussutissaqarpallaannginnerarpaa.

- Sullitara hashit kunngerinngilaat, taanna naqissusiivoq.

Taanna aningaasarpassuarnik imaluunniit biilinik akisuunik nassaartoqarsimannginneranik oqariartuuteqarpoq. Unnerluussisussaatitaasup angallat arsaarinnissutaasussatut piumasarisaa, sullitaata piginngilaa, Miki Lynge oqarpoq.

Unnerluunneqartoq ullumikkut eqqartuussinermi ullut qulit matuma siornarnit allat unnerluunneqartut arfinillit peqataanerannit eqqissisimanerorpasippoq. Unnerluunneqartup nammineq malorsorneqartutut aamma pisuunani uppernassutsiminik nassuiaanera paasinnginnerarlugu unnerluussisup nassuiaanerani, taassuma illersuisuni paasissutissanik naatsunik avitseqatigaa.

Hash prins – immaqalu kunngi

Tobias Bergip 29-nik ukiulik immaqa hashit kunngerinngikkaat ilumoorsinnaanerarpaa, kisianni tunuliaqutaasumik annermik peqarsinnaanera taassuma mattunnianngilaa. Unnerluussisussaatitaasup oqaaseqaataani aningaasa sumi toqqoqqaneranik nassuiaataasinnaallutik.

- Immaqa hashit kunngerinngilaat, kisianni taava uku unnerluunneqartut eqimattat aqullugit hashit prinserisinnaavaat, unnerluussisoq suliamik saqqummiusinermini oqarpoq, tassani angutip minnerpaamik ukiuni arfinilinni paarnaarunneqarnissaa piumasaraa.

Hash prinsiunerarlugu oqaaseqarnerata unnerluunneqartoq qungujuallatsippaa, niaqquminillu ileqimisaartuallappoq.

Illersuisup Miki Lyngep oqaaseqaat suliamini akupallappaa, unnerluussisullu sullitami hashit kunngerinngikkaat akuerimmagu nuannaarutiginerarlugu. Aammaarlunilu angallat sullitaminit pigineqanngitsoq naqissuseqqippaa, kisianni atornissaanut periarfissaqarsimanerarlugu.

7 kiilut nassaarineqartoq

Miki Lyngep aammaarluni hashi anngiortumik eqqussukkat 58,5 kiilut annerpaartaannut uppernarsaatit amigaataasut isumaqarluni naqissuserpaa, taakkunannga 7 kiilut taamaallaat arsaarinnissutigineqarput.

Tamatuma saniatigut unnerluussutit minnerusut marluk nassuerutigisai oqaatigeqqippai. Pisup aappaani politeeq ‘bøsserøv’-imik aamma ‘fucking danskersvin'-inik taasimavaa. Politiip 29-nik ukiullip apeqqutaanut akiumannginnerata kingorna tamanna pisimavoq. Tamannalu illersuisup sakkukillisaataasariaqartoq isumaqarfigaa.

Suliap aappaani oqarasuaatikkut oqaloqateqarnermini ilaatigut inummut oqarsimavoq: ‘Atera taaqqikkaluarukku, taava ajornerpaamik pissavakkit’. Oqaloqatigiinneq politiinit tusarnaarneqarpoq. Illersuisup sullitani tamanna sioqqutilaarlugu oqaluussaminut qisuariaateqaqqullugit sianersimagaluartoq oqaatigaa, kisianni itigartinneqarsimalluni. Tassanilu aamma sakkukillisaataasariaqarnerarpaa.

29-nik ukiulik arlaleriarluni nakuusernermut sioorasaarinermunllu unnerluunneqarput, taakkunani pisuunnginnerarpoq.

Marlunngornermi eqqartuussineq minutsit 30-t ataallugit ingerlareersut naammassivoq, unnerluunneqartorlu pineqaatissinneqarsimasut inissiisarfiannut ingerlanneqarpoq. Taassuma politiillu akornanni pissutsit eqqissisimaannarput.

Powered by Labrador CMS