Ukiumut nalunaarusiaq
Hashi 44 millioninik nalilik arsaarinnissutaasoq
Siorna hashi 63 kiilu aamma sukasaatit 44 millionit koruunit nalinginut missiliorneqartut arsaarinnissutigineqarsimapput.
Nunatsinni pinerluttarneq pillugu politiit ukiumut 2016-imut nalunaarusiaani tamanna atuarneqarsinnaavoq, taanna politimesterip Bjørn Tegner Bayip ullumi marlunngornermi saqqummiuppaa.
Taakku annerpaartaat illoqarfiit pingaarnersaanni Nuummi 24 kiilut sinneqartut sukasaatillu arsaarinnissutigineqarput. Hashimik unioqqutitsilluni suliaqarnermut atatillugu aningaasat 1,6 millionit koruunit tikillugit arsaarinnissutigineqarput.
Aamma atuakkit: Arnat amerlanerusut pinngitsaalineqartarput meeqqallu eqqunngitsuliorfigineqartarlutik
Nunatsinni timmisartorluni angallannermi qitiusoq, Kangerlussuaq, arsaarinniffiumerpaat aappaattut inissippoq 12 kiilut arsaarinnissutaammata, taamatullu hashimik tuniniaanermut aningaasat attuumassuteqartut 1,8 millionit koruunit missaanniittut.
Aanngajaarniutit pillugit inatsimmik unioqqutitsinermut tunngatillugu suliat tamarmik eqqartuussivinnut eqqartuussisumut anngunneq ajorput.
Affaat sinnerlugit pineqaatissinneqarput
Suliat affaat sinnilaarlugit - 54 procentit - pineqaatissiinermik inerneqarput, 5 procentiilu eqqartuussivimmi iperagaapput. Politiit suliani misissugaanni 41 procentersuit paasineqaratit unitsikkallarneqarput, taamaalillutillu eqqartuussivimmut ingerlateqqinneqanngillat.
Aamma atuaruk: Politiit: Pinerluuteqartut 2016-imi amerleriarneranni pitsanngoriaat ataasiinnaavoq