Hash pillugu suliarujussuaq kiisami eqqartuussissutigineqalerpoq
Nunatsinni oqaluttuarisaanermi hash pillugu suliat annersaasa aamma misissuinermik pisariaqartitsinerpaat ilaat naammassineqangajalerpoq.
Pinerluuteqarsimasunut inissiisarfinni arlalinni inuit arfineq-marluk siammarterlugit juulimili 2017-mi tigummigallarneqalerput. Maanna Nunatsinni Eqqartuussiviup eqqartuussinissaq apriilip 16-anni aallartittussatut ullulerpaa.
Unnerluussut
Unnerluussisoq Tobias Berg, Kalaallit Nunaanni Politiineersoq, inuit arfineq-marluk unnerluunneqarnissaannut unnerluussut naammassisarneqaleruttortoq ilisimatitsivoq.
- Unnerluussut piareerniarlugu ilungersorluta sulivugut, apriilip 16-anni eqqartuussivimmiinniassagatta, Tobias Berg, Sermitsiaq.AG-mut ilisimatitsivoq.
Suliap hash pillugu suliat annersaasa ilagigaat qularutissaanngilaq. Kisianni tamatuma saniatigut pisariullunilu politiit misissuinerannut annertuumik piumasaqaateqarsimavoq.
- Misissuinermut tunngatillugu piffissarujussuarmik atuiffiuvoq. Kisianni aamma allatigut pisariusorujussuuvoq, unnerluussisoq oqarpoq.
Inissiinissamut unammillernartut
Nuummi eqqartuussivimmi suliarineqalerpat, politiit suliami inissiinissaminni unamminartoqartitsipput. Tassami illoqarfiit pingaarnersaanni pinerluuteqarsimasunut inissiisarfik ataasiinnaatillugu unnerluunneqartut ilaasa imminnut oqaloqatigiinnginnissaat qanoq pinngitsoortinneqarsinnaanerat apeqqutaavoq.
Unnerluutigineqartummi taakku arfineq-marluk Nunatsinni inissiisarfinni immikkut inissinneqarsimapput. Kisianni pingasut Nuummiipput.
- Misissuineq eqqarsaatigalugu pasineqartut ilaat illoqarfinnut allanut inissittariaqarsimavagut, taamaalilluta nassuiaatissaminnik isumaqatigiissinnaanerat pinngitsoortissagatsigu, Tobias Berg nassuiaavoq.
Maalaaruteqartoqartoq
Taamatut pisoqarnera pasineqartut ilaata aapparisaanik maalaaruteqartoqarneranik kinguneqarpoq.
Pasineqartup Qaqortumut inissinneqarsimanera maalaarutigineqarpoq, tamanna meeqqap ataataminik takunnissinnaaneranut killeqartitsimmat.
- Maalaarutigineqartoq politiit eqqartuussissuserisuinit suliarineqarpoq, Tobias Berg nassuiaavoq.
Pineqartoq pingasunik ukiulimmik meeraqaraluartoq, Kujataanut inissinneqarsimaneranut misissuinermut tunngasunik suliami aalajangiisoqartoq, taanna ilisimatitsivoq.
Paasinnittut
- Ilaquttanut ungasissumut inissinneqarluni tigummigallarneqarneq annertuumik misinnartoq paasilluarsinnaavarput. Kisianni misissuineq sunniuteqarsinnaaneralu eqqarsaatigalugu taamatut aalajangiisoqarnikuuvoq, unnerluussisoq oqarpoq, taannalu tigummigallarneqartut pillugit nalunaarummut innersuussivoq.
- Meeqqanut tunngatillugu, tigummigallarneqartup meeqqani ataaseq ataallugu ukiulik tigummigallagaaffimmi tigummisinnaagaa nalunaarummi taamaallaat allaqqavoq, allannguisoqassappat politikkikkut aalajangiisoqartariaqarpoq, Tobias Berg naqissusiivoq.
Qitiusumik inissisimasoq
Pasineqartuni marluk hash pillugu suliami qitiusumik inissisimasut, Sermitsiaq.AG-p paasivaa, taamaattumillu immikkut inissinneqartariaqartut. Taakku marluullutik meeraqarput, Nuummeersuullutillu. Taamaattumillu ilaqutariit aappaannut politiit isumaginninnikkut iliuuseqarsimasinnaanngillat.
Kalaallit Nunaanni unnerluussisussaatitaasup aamma ilisamatitsissutigaa, pasineqartumut ilaqutaasut Nuup avataanut inissinneqarsimasumut, pisinnaaffimminnit sivisunerusumik pulaarsinnaanerannut periarfissiisoqarsimasoq.