Pinngortitami ajunaarnersuaq

Harvey USA-mi pinngortitami ajunaarnersuarni akisunerpaanngorsinnaasoq

Inuit ikinnerpaamik tallimat anorersuup Harveyip illoqarfissuarmut Houstonimut qarsutsinerata kingorna toqupput. Ilisimasallillu ilimagaat ajoqusiinerit milliardinik arlalinnik naleqassasut.

Den lokale sheriff i Fort Bent Count løfter to evakuerede ombord på en båd

Texasimi ulluni kingullerni siallerujussuartarnera illoqarfissuup Houstonip oqaluttuarisaanerani aatsaat taama qarsutsineqarneranik kinguneqarpoq, silamillu ilimasaarutit ulluni aggersuni silagissinissaanik takutitsinngillat.

New York Times allappoq anorersuarneranit qarsutsinersuaqarneratalu kingunerisaanik inuit ikinnerpaamik tallimat toqusimasut inuillu ikinnerpaamik qulit aqqunaatitserujussuarsimasut. Taassuma saniatigut inuit arlallit maqaasineqarput.

Ulussaarsuup Harveyip sapaatit-akunnerata naanera sioqqullugu nunamut anngummst kingornalu kiattup anorersuaatut nalilerneqarluni, USA-p illoqarfiisa anginerit sisamaanni Houstonimi sumiiffinni arlalinni 80 centimeteringajannik siallerpoq.

- Houstonip oqaluttuarisaanerani qarsutsinernik ajunaarnersuit anginersaraat. Aatsaat taama siallertigitillugu takuarput, Steve Bowen sillimmasiisarfimmi Aeon Befieldimi silasiortut pisortaat nutaarsiassaqartitsivimmut Reutersimut oqarpoq.

Illoqarfiup aqquserngi arlallit meterinik arlalinnik qarsunneqarsimapput.

Aviisi Houston Chronicle allappoq atuarfiit amerlanersaanni atuartitsineq sapaatit-akunneranni aggersumi taamaatiinnarneqarsimasoq.

Parnaarussivinni pingasuni parnaarussat qarsutsinerit pissutigalugit qimagussortinneqarsimapput, oqartussallu innuttaasut kaammattorpaat angerlarsimaffimminniiginnaqqullugit.

Taamatut kaammattuuteqarneq illuni qarsutsinermit eqqugaasimasuni najugaqartunut aamma atuuppoq, aqqusinerpassuimmi angallavigineqarsinnaanngillat. Illoqarfimmi innuttaasut 2,3 millioniusut pisariaqassappat illut qaavinut qaqinissaannik kaammattorneqarput.

Annaassiniartartut sapaatiummat unnukkut inuit 2000-it sinnerlugit nussorsimavaat, ilaatigut umiatsiat atorlugit.

Houstonimi timmisartoqarfiit marluusut sapaammi timmisartuussinissat tamaasa taamaatiinnarpaat, Houstonillu umiarsualiviata oqaaseqartartuata sapaatiummut unnukkut ilisimatitsissutigaa suliaqarfiit tamaasa ataasinngornermi matoqqatinneqassasut.

Ulussaarsuup Katrinap 2005-imi pisup kingorna USA-mi anorersuit sakkortunersarivaat.

Silarlunneratalu aningaasatigut kingunerlutsitserujussuarnisssa naatsorsuutigineqarpoq. Amerikamimi uuliamik gassimillu suliffissuaqarnerup qitiusoqarfik Harveyimit eqqugaavoq. Akuiaaviit arlalissuit matuneqartariaqarsimapput sinerissallu avataani uuliasiorfinnit aamma qimagussortitsisoqarsimalluni.

- Qanoq siallertiginera eqqarsaatigalugu ajoqusernerit Katrinap kingornatulli annertutigisinnaapput, Loretta Worters The Insurance Information Institutemeersoq Reutersimut taama oqarpoq.

Powered by Labrador CMS