Akissut
Hardenberg Nuuk TV-mut: Arlariinnik kukkusumik paasissutissiisoqarpoq
Naalakkersuisut siulittaasuata naalakkersuisoqarfiani pisortaanerusimasup Svend Hardenbergip illusisimanera pillugu Nuuk TV nutaarsiasseeqqammerpoq. Arlariinni paatsoortoqarsimasoq Svend Hardenberg oqarpoq
Inatsisit malillugit illusivunga aamma Nuuk TV-ip nutaarsiassaa arlariinnik kukkuneqarpoq.
Svend Hardenberg Sermitsiaq.AG-mut oqarpoq.
Nuuk TV-mit Svend Hardenbergimut attaveqartoqarsimanngitsoq inuttaa oqarpoq.
Illusinerminut atatillugu aamma sipaagaqarsimanani oqaatigaa. Tassami Nuuk TV-mit oqaatigineqarpoq illu 2,7 millioninik naleqartoq Svend Hardenbergip nalinganit 225.000 koruuninik sipaagaqarsimasoq.
- Kisitsisit taakku sumit aallaaveqarnersut ilisimanngilara, Svend Hardenberg oqarpoq.
- Aamma suliap ingerlanera allaanerusunngorlugu nutaarsiassami takutinneqarpoq. Tassami illumik pisinissannik sulinera ukioq kingulleq juunimi aallartippara, oqarpoq.
Aallakaatitaq tamaat uani takuneqarsinnaavoq.
Greenland Investimi siulersuisuni siulittaasuuvoq, nutaarsiassanik malinnaasarnani oqaatigaa. Ikinngutaata takoqqusimammagu aatsaat nutaarsiassaq takusimanerarpaa.
Hotel Hans Egedemi 'dronningsuit'-imiissimanerat pillugu Nuuk TV nutaarsiassiivoq, imalu oqaaseqarfigaa:
- Tassani najugaqarnikuunngilagut. Illumi nutarterisoqartussaagaluarpoq novembarimili, tamannali allanngortinneqarpoq. Nutarterineq aamma suli naammassineqanngilaq, oqarpoq.
Juulimi illu nutarterneqassasoq Hardenbergip naatsorsuutigaa.