Aleqap atornerluinera
Hardenberg Kielsenimit tatineqarpoq - misissuisitsinissaq isumaliutigaa
Naalakkersuisunut siulittaasuugallartup Kim Kielsenip Aleqa Hammondimut tunngassuteqartut misissuisoqarnissaat neriuutigaa
Inatsisartunut qinersinissamut qineqqusaartoqaraluartoq Naalakkersuisut siulittaasorigallagaat Kim Kielsen Siumumeersoq allanik aamma suliassaqarpoq.
Naalakkersuisut siulittaasuata Naalakkersuisoqarfiani pisortaq Svend Hardenberg piffissami qaninnerpaami naliliissaaq Aleqa Hammondimut bilaginut tunngasumi nammineq sulisunilu qaninnerpaat misissuiffigineqassanersut. Aleqa Hammondip nunatta karsianit namminerminut atuivoq 106.363,27 koruuninik 2013-mi maajip 31-anit ukioq manna maajip 21-ata tungaanut.
Aleqa Hammondimut akileeqqusissutinik naak nassiussisoqartaraluartoq akiligassat septembarip pingajuanni aatsaat akilerneqarput.
Naalakkersuisunut siulittaasuugallartup Kim Kielsenip, Siumumeersup, Siulittaasup Naalakkersuisoqarfiani qullersat qinnuigisimavai nassuiaateqaqqullugit, sapaatip- akunnerini kingullerni AG-mi allaaserineqartareersoq Namminersorlutik Oqartussani atorfillit qullersat ilaat pisimasumi peqataasarsimasut.
Aleqa Hammond 106.363,27 koruuninik atornermini atorfilittanit ikiorneqarsimasoq AG allaaserisaqartareerpoq.
Kim Kielsen akissuteqarfigineqartinnani tamanna pillugu apersorneqarumanngilaq. Piaaraluneerluni piaaraluniinngikkuniluunniit atorfillit qullersaat immikkut tativaa, peqqullugulu apeqqumminik isorinnittunik allakkiaq AG-mut tunniuteqqullugu, aviisi allappoq.
AG uani pisiarineqarsinnaavoq: