Folketing
Hammond: Pitsanngorsaasoqassasoq naatsorsuutigaara
Folketingimi ataatsimeersuarneq ataatsinngormat ammaanersiorlugu oqallittoqarpoq. Lars Løkke Rasmussenip (V) sisamanngormat nalunaarutaa politikkerinit oqallisigineqarluni
Folketingimi ataatsimeersuarneq ataasinngormat ammaanersiorneqarpoq. Naalakkersuisooqatigiilerlaat Venstre, Liberal Alliance Konservativellu siuttoralugit.
Naalakkersuisooqatigiilersut erseqqissaassutigaat naalagaaffeqatigiinnermi pingaartitat qitiulluinnassasut anguniakkatigut tamatigut, Issittoq pillugu suliniarnermi nunat akornanni aammalu nunat tamalaat akornanni pingaaruteqarluinnartuusoq minnerunngitsumillu Issittumi Siunnersuisooqatigiinni sulinermi pingaaruteqarluinnassasut.
Naalakkersuisooqatigiilertut Kalaallit Nunaanni inatsisitigut atuutsitsinermi Danmarki naligalugu suliniutigineqartussat Aleqa Hammondip (A) isumalluarfigai.
Atuaruk: Aleqa Hammond: Pisinnaatitaaffigut Danmarkip unioqqutippai
Aaqqitassarpassuit
- Siullermik ministeriuneq pilluarit nutaamik naalakkersuisuutitaqarlernerni. Naalakkersuisut nutaamik suliumassuseqarlutik anguniagassaminnik erseqqissaanerat Nunatsinnut annertuumik neriuuteqarfigaarput neriuppungalu suleqatigiilluartoqarumaartoq.
- Naalakkersuisooqatigiikkumallugu anguniagassani Nunarput pillugu akisussaaffigisaniittut iliuuseqarfigineqarniarneri atuarlugit nuannaajallaatigaara pissutigalugu danskit susassaqarfii ukiorpassuanngortuni pimoorussiffigineqarsimanngimmata, oqaluttarfimmit Aleqa Hammond oqarpoq.
Atuaruk: Naalakkersuisut nutaat piviusunngortut
Politeeqarfiit aserfallassimasut
Nunatsinni innuttaasut inatsisitigut illersorneqarluarsinnaasumik atugassaqartoqarnissaa pingaaruteqartippaa. Ukiorpassuarni susassaqarfiup suminginnaaffigineqarsimanerata kinguneranik suliassat qaleriiaanginnalersimasut aamma oqaatigaa.
- Sullissinerup kingaannerujussuanik kinguneqarnera Naalagaaffeqatigiinnermi atugassatigut naligiisitsinertut taaneqarsinnaanngilluinnarpoq.
Politeeqarfeqarpugut suli illutatigut aamma aserfallassimaqisunik, anartarfii anittagaapput ilaatigullu illutai asiulersuupput isertitsiviillu ilai ullutsinnut tulluanngerujussuarnerarpai.
- Naalagaaffittut innuttaasut tamarmik naligiimmik atugassaqartitsissallutik pisussaaffeqarput tamassumalu kinguneraa naalakkersuisooqatigiilersut piviusunngortitsiniarnerminni annertoorujussuarmik suliassaqarnerat, taamaanngippammi anguniakkat kusanartut pingaaruteqarluinnartullu asuli oqaasiussapput kusassaatit, Aleqa Hammond oqarpoq.
Atuaruk: Aleqa Hammond: Aqutsineq tigussavarput
Aleqa Hammondip oqaaseqaataa tamaat allaaserisap saneraaniittoq atuaruk