nalliuttut

Hammond: Erfalasulertalernissaq pisussaaffiliivoq

Folketingimut ilaasortap Aleqa Hammondip (S) partiimi siulittaasumisulli kalaallit savalimmiullu nalliuttorsiorneranni erfalasuinik amusisalernissamik qallunaat aalajangernerat nuannaarutigaa

Folketingimut ilaasortaq Aleqa Hammond, Siumut, ministeriunerlu

Ministeriuneq Lars Løkke Rasmussen (V) pingasunngormat ilassinnippoq, Savalimmiut Kalaallillu Nunaata nalliuttorsiorneranni erfalasuinik pisortat erfalasulertalernissamik naalakkersuisut aalajangernerat malunnartinniarlugu.

Siunissami naalagaaffiup suliffeqarfii kalaallit savalimmiullu erfalasuinik amusisalissapput, Kalaallit Nunaat Savalimmiullu inuiattut ullorsioraangata.

Aleqa nersorinnippoq

Ilassinninnermut atatillugu folketingimut ilaasortaq Aleqa Hammond, erfalasulertalernissap eqqunneqarnera pillugu oqaaseqalaarumalluni qinnuteqarpoq.

Nersualaarinnillunilu aallartippoq.

– Isumaqarpunga inussiarnisaarneq nalissaqanngitsuusoq, siunissami Erfalasorput naalagaaffiup illuutaani Danmarkillu nunani allani aallartitaqarfiini amuneqartalerniarmat.

Siumut assigalugu ilaliivoq

– Ulloq manna oqaluttuarisaanikkut pingaaruteqarpoq. Ullumikkut Naalagaaffeqatigiit anguniakkatik nutaat malunnartippaat. Assigiinngissuteqarnitsinnut, kulturimut oqaatsinullu ataqqinninnermik takutitsisoqarpoq.

– Danmarkip ullumi takutippaa Kalaallit Nunaat pingaaruteqartuusoq, isumaqarpungalu tamanna siunissami nunanut allanut politikkimi takuneqarsinnaassasoq. Nalunaajaataavoq Kalaallit Nunaat Savalimmiullu kunngeqarfimmi pingaaruteqartuusut, Siumut sinnerlugu Folketingimut ilaasortaq Aleqa Hammond oqarpoq.

Oqaasii partiip siulittaasuata Kim Kielsenip oqaasiinut naapertuupput.

Erfalasulertarneq pisussaaffiliivoq

– Tamanna peqatigalugu nalunaajaataavoq kunngeqarfimmik pisussaaffiliisoq naalagaaffeqatigiit issittortaani suliutiminik pingaartitsinissaanik, Aleqa Hammond oqarpoq.

Ilassinninneq pivoq Københavnimi savalimmiormiut neriniartarfianni KOKS-imi.

Ilassinninnermi peqataapput naalakkersuisut, Folketingip siulittaasua aammalu kalaallit savalimmiormiullu sinniisui.

Powered by Labrador CMS