Nunani avannarlerni suleqatigiinneq
Hallo Norden nunatsinni allaffittaarpoq
Paasissutissiisarfik apeqqutinik ikiuussinnaavoq nunani avannarlerni allani najugaqarniaraanni suliniaraannilu
Savalimmiuni imaluunniit Sverigemi najugaqarlungalu suliniaruma immikkut ittunik apeqqutissaqarpa sianiginiagassannik?
Apeqqutit taamaattut maanna Kalaallit Nunaanni akissutissarsineqarsinnaalissapput, Namminersorlutik Oqartussat paasissutissiipput.
Nordisk Ministerrådip paasissutissiisarfia, Hallo Norden, Nuummi allaffittaarpoq. Paasissutissiisarfiup siunertaraa inuinnaat Nunani Avannarlerni angalasinnaanerisa ajornannginnerlulersinnissaa.
Malittarisassat assigiinngitsut
Nunani avannarlerni suleqatigiinnermut Naalakkersuisup Doris Jakobsenip (S) paasissutissiissutigaa killissatigut arlalinnik aporfissaqartoq piareersimaffigisassanik.
– Tassaasinnaavoq kalaaleq ilinniagaqartoq Danmarkimut ilinniakkaminik nangitsiartortoq, Danmarkimilu biilersinnaanerminik ajornartorsiuteqartoq, pissutigalugu qallunaat kalaallillu kørekortii assigiinngissuteqarmata. Innuttaasutut ajornartorsiutinik taamaattunik naammattuuigaanni maanna Hallo Nordenip Kalaallit Nunaanni immikkoortoqarfittaavanut saaffiginnittoqarsinnaavoq, tassani ajornartorsiutip iliuuseqarfiginissaanut siunnersorneqarlunilu najoqqutassiortoqarsinnaammat, Doris Jakobsen nassuiaavoq.
Hallo Nordenip allaffittaava NAPA-p, Nunani Avannarlerni Piorsarsimassutsikkut Attaveqaatip, inissisimaffianiippoq, Nuummi kulturip illorsuani Katuami.