Halibut Greenland tuniniarneqanngilaq

Ilulissani aalisakkerivup qullersaasa nutaamik nalunaaruteqarnerat, Sermitsiaq aviisimi 2017-ip naalernernerani suliffeqarfiup Savalimmiormiut suliffeqarfiutaat Rajani/Rasmussen aqqutigalugu tuniniarneqarnera pillugu allaatigisaqarnerata kingorna pivoq.

Nalimik allannguineq

- Suliffeqarfiup ineriartoqqinnissaa pillugu periarfissanik assigiinngittunik misissuivugut, siulersuisunut siulittaasoq Johan Villadsen tusagassiutinullu nalunaarummi suliffeqarfiup nalinganik allanngortitsisoqarsimanera paasissutissiaralugu, allappoq.

- Ersarissarusupparput sumiiffinni najugaqartunik tunuliaquteqarluarluta piginnittoqarnerput suliffeqarfiutitsinni nukittoqutitut isigigatsigut. Isuma pigisuaannarsimasarput tassaasoq aalisartut periarfissaqartariaqartut pisortat suliffeqarfiuterujussuaannut imaluunniit suliffeqarfimmut sumiiffimmi najugaqartut pigisaannut tunisissanerlutik allanngornikuunngilaq. Allatut oqaatigalugu unammilleqatigiinnermi akinik naapertuuttunik kiisalu aalisartunut kiffartuussilluarnermik qulakkeerinnikkusunnerput attapparput, siulersuisunut siulittaasoq nassuiaavoq.

Anguniakkat

Naak Qeqertarsuup Tunuani qalerallit tunisarineqarsimasut ikiliartuinnaleraluartut, aalisakkeriviup anguniagai allanngortinneqarsimanngitsut, tusagassiuutinut nalunaarummi allassimavoq.

- Periarfissaq iluatsillugu naqissuserusupparput, Nunatta avannaani inerisaanissamut siunertarput allanngornikuunngimmat. Suliniutit tamakkua sumiiffimmi aalisartut suleqatigalugit ingerlavoq, taakkua suliffeqarfiutitsinni piginneqataallutik imaluunniit piginneqataalersinnaallutik. Allatut oqaatigalugu suliffeqarfiorusuppugut sumiiffinni assigiinngittuni malunnaatilimmik allannguisut

atungarissaartoqarnerunissaanut, tamatumani suliaqarfitta iluani unammilleqatigiittoqarneranik qulakkeerinninnikkut, siulersuisunut siulittaasoq erseqqissaavoq.

Appariarnermi sinneqartoorneq

Suliffeqarfik 2015-imi 30 million koruuninik sinneqartoorsimavoq, 2016-imilu taamaallaat 8 million koruuninik sinneqartoorsimalluni.