Aalisarneq

Halibut Greenland sulisunik piginnaasalinnik pissarsiorpoq

Ilulissani ingerlatsivik alliartorpoq, taamaattumillu pisortanik pisortaaqqanillu, aalisakkerinermik ilinniagaqarsimasunik amerlanerusunik atorfissaqartitsivoq

Lars Lennert-Sandgreen, Qaasuisup Kommunia
Assi toqqorsivimmit, Lars Sandgreen, Halibut Greenlandimi suliniuteqarnermut ineriartornermullu pisortaq

Ingerlatsiviit alliartoraangamik unammilligassaqartarput.

Halibut Greenlandip tamanna nalunngilaa, tassami ingerlatsivik Ilulissanit aallaavilik pisortanik pisortaaqqanillu, aalisakkerinermik, pingaartumik aalisakkerinermi teknolog-nik, amerlanerusunik atorfissaqartitsivoq.

Taamaattumik Halibut Greenlandip namminersorlutik oqartussani ilinniagaqartitsinermut naalakkersuisoqarfik attavigeqqammersimavaa, ilinniarfiit suleqatigalugit aalisakkerinermi teknolog-inik ukiuni marlunni sivisussusilimmik ilinniagaqartitsinermik aallartitsinissamut periarfissanik misissuiniarluni.

– Halibut Greenland ullumikkut Upernaviup pigisaani Aappilattumi selskabimik immikkoortortaqarpoq, piffissamilu kingullermi aningaaasaatit amerlisinneqarnerannut atatillugu aalisartut suli amerlanerit aningaasaleeqataasalerusussimapput, Halibut Greenland A/S-ip ingerlalluarnera pissutigalugu, Halibut Greenlandimi suliniuteqarnermut ineriartornermullu pisortaq Lars Sandgreen, tusagassiornermut nalunaarutikkut allappoq.

Taamaallaat Uummannami aalisarnermik piniarnermillu linniarfeqarpoq

Halibut Greenlandip tupigusuutigaa sunngu.gl-imi ilinniarfigisinnaasat 79-it toqqarneqarsinnaammata:

– Ilinniagaqarfilli aalisakkerinermik samminnitttoq tassatuaavoq Uummannami Aalisarnermik Piniarnermillu Ilinniarfik. Maniitsumi ATI-mik ilinniagaqarfik matuneqarsimavoq, ullumilu Narsami Inuussutissalerinermik Ilinniarfiup ataaniilluni, tassanilu ukiunik marlunnik sivisussusilimmik ´provesteknikeritut´, aamma ´procesteknikeritut inuussutissanik nakkutilliinermik immikkut ilisimasalittut´ ilinniagaqartoqarsinnaavoq.

– Ilami eqqarsarnartoqarpoq Kalaallit Nunaanni aalisakkerineq taama annertutigisoq ullumikkut aalisakkerinermik ilinniagaqaernissamut periarfissanik pilerinarnerusunik pilersitsiniartoqanngimmat. Tamanna assersuutigalugu ilaatigut praktikkerfissanik allanngueqataasinnaassagaluarpoq, Lars Sandgreen oqaluttuarpoq.

Powered by Labrador CMS