Aalisarneq

Halibut Greenland 46 millioner koruuninik sinneqartooruteqarpoq

Qaleralinnik tunisassiorfik, pingaartumik aalisartunit pigineqartoq, 2015-imi akileraarutit suli ilanngaatiginagit 45,9 millioner koruuninik sinneqartooruteqarpoq

Halibut Greenland
Halibut Greenlandip Ilulissani aalisakkanik suliffissua

Halibut Greenland 2015-imi ukiumut naatsorsuutimigut angusarissaarpoq, angusanilu pitsanngoriartillugit.

Selskabi akileraarutit suli ilanngaatiginagit 45,9 millioner koruuninik sinneqartooruteqarpoq, akileraarutillu ilanngaatigereerlugit angusat 30,2 millioner koruuniupput. Selskabi landskarsimut kommunillu karsianut katillugit 43,8 millioner koruuninik isertitsisimavoq.

Selskabip akiliisinnaassuseqarnera 21,1 procentiuvoq, tamannalu naammaginarluinnartutut isigineqarpoq, selskabi tusagassiorfinnut nalunaarutikkut paasissutissiivoq.

Kaaviiaartitat amerleriartut

Halibut Greenland 2015-imi kaaviiaartitai 201,2 millioner koruuniupput, tassa ukiumut siulianut sanilliullugit 56,4 millioner koruuninik amerleriarsimallutik.

Halibut Greenland 2015-imi aalisartut tunisaannut tunisassiornermilu sulisut akissarsiaannut 108,7 millioner koruuninik aningaasartuuteqarsimavoq, tamatumanilu aamma pitsanngoriaateqangaatsiartoqarsimavoq siornamut sanilliullugu 20,9 millioner koruuninik.

Aalisarneq ingerlalluartoq

– Angusarissaarnitsinnut ilaatigut pissutaavoq selskabimut pilersuisut aalisarluarsimanerat dollarillu naligissaarsimanera. Pingaarnerusutut ingerlatat ingerlalluarneqarsimapput, tassa tunisassianik pitsaasunik tunisassiorneq, aningaasartuutit aqunneqarnerat ataavartumillu annertusaanissaq sammineqarsimammata, pisortaq Niels Thomsen oqarpoq.

2015-imi sulisut agguaqatigiissillugu 67-iusimapput, 2015-imitd 15-inik amerlanerullutik. Pisortap erseqqissarpaa selskabi piffissat ilaanni sulisussaaleqisarsimasoq, tunisassiornermili aalajaatsunik sulisoqartoq pikkorissunik, aalajaatsumik ukioq kaajallallugu sulisartunik.

Nunami tunitsiviit nutaat

– Ukiuni kingullerni angusarissartarnerup takutippaa selskabip siuariartornermik ineriartortitsinermillu sammisaqarnera ingerlaannassasoq. Taamaattumik selskabit pigisatta selskabillu peqatigisatta ataanni nunami tunitsivinnik nutaanik pilersitsissaagut. Nunami tunitsivinnik nutdaanik pilersitsinikkut sumiiffinni aalisartut piginneqataalernissaminnut tamatigut periarfissaqartassapput, pisortaq Niels Thomsen oqarpoq.

Powered by Labrador CMS