aalisakkerivik
Halibut Aappilattumi fabrikkiliussaaq
Halibut Greenland aappaagu Aappilattumi aalisakkeriviliussaaq. Taamaattumik Royal Greenland nunaqarfimmi aalisakkerivimmut aningaasaleeqqinnissaminut nangaassuteqalerpoq
Halibut Greenlandip Aappilattumi alisakkerivimmik nutaarluinnarmik aappaagu sanaartorluni aallartinnissaa maanna paasinarsivoq. Taamaalilluni Royal Greenlandip nunaqarfimmi kisermaassilluni tunitsiviuteqarnera qaleralinnillu tunisassiornera kipitinneqartussanngorpoq, Aappilattulerngusaanneq aappaagumiit aallartippat.
Unammillertuarnissaq
Erik Siverthsen, Ilulissani Halibut Greenlandimi pisortap tullersortaa, uppernarsaavoq, Aappilattumi aalisakkeriviup sanaartorneqarnissaa aappaagu aallartinneqartussaasoq, taannalu ukiup naanerani naammassineqarsimassasoq naatsorsuutigineqartoq. Qaleralinnik japan-cutinik tunisassiornerup saniatigut saarullinnik tunisassiornissaq naatsor- suutigineqarpoq. Halibut Greenlandip suliffeqarfik Aappilattoq Aps. siorna pilersippaa.
– Royal Greenladimut unammillertuussaagut. Aalisartut tuntsivimmik piginneqataasinnaassapput, taamaattumillu aalisartuniit tapersersorneqarnissarput naatsorsuutigaarput. Kisianni aalisartut piginneqataanngikkaluartulluunniit aamma uagutsinnut tunioraasinnaassapput. Erik Siverthsen oqarpoq.
Halibut Greenlandip aalisakkanut tunitsiviliornissaa Qaasuitsup Kommuniata tapersersorpaa, taamaalillunilu aalisakkerivissap tungaanut aqqusinniornissamut 2 millioner koruuninik immikkoortitsereersimalluni.
Jess Svane, Siumut, Qaasuitsup Kommuniani borgmesteriugallartoq, oqarpoq, kommunip suliniutit nunami suliffissanik pilersitsinissamik siunertaqartut aningaasaliiffiginissaat soqutigisarigaa.
Masanti Halibut Greenland sinnerlugu misissuereerluni decembarimi 2013-imi pilersaarusiamik pingaarnermik, ilaatigut aalisakkanik tunisassior- fiup innaallagissamik imermillu qanoq pisariaqartitsiginissaanik imaqartumik, saqqummiussivoq.
Misissuinermilu paasineqarpoq nunaqarfimmi innaallagissiorfik innaallagissamik atuinerulernermik tunniussisinnaasoq, imeqarfillu imermik tunisassiorfimmut pilersuinissamut naammattumik naammassisinnaasaqartoq. Nukissiorfiit piffissami aggersumi Aappilattumi naammassisinnaasanik annertusaanissamik aamma pilersaaruteqarpoq.
Umiarsuaq qaleralinnut tunitsivik Ågot, Halibut Greenlandimit pigineqartoq, Upernaviup eqqaaniitinneqarpoq.
Allaaserineqartoq tamaat aviisimi Tamanut Avannaanimi atuarneqarsinnaavoq. Aviisi akeqanngitsumik ataani aaneqarsinnaavoq: