Aalisarneq

Halibut aalisakkerinermik ilinniartitserusuppoq

Siunissami aalisakkerinermut tunngasunut assigiinngitsunik ilinniakkanik peqarnissaa, suliffeqarfiup neriuutigaa

Siunissami aalisakkerinermut tunngasunut assigiinngitsunik ilinniakkanik peqarnissaa, suliffeqarfiup neriuutigaa

- Naluneqanngitsutut ajoraluartumik aalisakkerinerup silarsuaani pisinnaasaqarluartunik sulisussaaleqineq atuuppoq, taamatullu aalisakkerinerup suliatut suliffittullu inuiaqatigiinnit isigineqarnera pitsaanngilaq. Suliassaqarfittut inuusuttunit sulilertussanit pilerinartutut isigineqanngilaq, taamaattumillu ilaatigut suliffinnik allanik periarfissaqannginnermi toqqartariaqakkatut inissisimasoq eqqarsarnarpoq.

Halibut Greenlandip pisortaa, Niels Thomsen, tusagassiuutinut nalunaarummi taama allappoq.

Atuaruk: Kinamiut maanna Nunatsinnut tikilerput

Sulisartut nunani allaneersut killilerneqassapput

Taamaammat aalisakkeriviup Qaasuitsup Kommunia suleqatigalugu sulisooreersut sulisorineqalertussallu sapaatip akunnerata siualiani pinginnaanngorsaanerit maajip aallartilaarnerata tungaanut ingerlanneqassapput.

Siunissami nunani allaneersunik suliartortartut akimmisaartinniarlugit pinginnaanngorsaanerit ingerlanneqassapput, aammalu Nunatsinni pinginnaanngorsaanernik taama ittunik periarfissaqannginnera patsisit ilagivaat.

- Eqqarsarnartuuvoq nunatsinni ilinniartitaanikkut aaqqissuussani inuussutissarsiutitta pingaarnersaat inissaqartinneqanngimmat ineriartortitsiviunanilu. Tamanna allanngortittariaqarparput, siunissamilu inuusuttut aalisarnerup iluani suliassaqarfinni assigiinngitsuni ilinniakkanik amerlasuunik toqqagassaqartariaqarput, Niels Thomsen oqarpoq.

Ilinniartitaanermut aqqutissiuissaaq

Pikkorissarneq ingerlanneqartoq nutaaliorluni misiliinertut isigineqartariaqarpoq. Pikkorissartut tassaapput tunisassiornermik suliaqareersut kiisalu suliffissarsiortutut nalunaarsimasut kommunimit toqqarneqarsimasut.

- Pikkorissareernerup kingorna anguniagaavoq pikkorissarsimasut EUC Nord-ip neqeroorutigiligassaanik ilinniakkamik piginnaasaqalerfiusumik ingerlariaqqiffissamut “fiskerioperatør”-itut ilinnialernissamut ammaassivigineqarnissaat, Halibut Greenland nalunaaruteqarpoq.

Maannalu pikkorissarneq ingerlanneqartoq atuagarsornertaqarlunilu sulianik misileraanermik imaqarpoq, ilaatigullu pikkorissaataapput:

Inuussutissalerinermi eqqiluisaarneq aaqqissuussaasumillu sulianut nakkutiginnissinnaaneq, tunisassiornermi suleriutsit isumannaatsut, assingiiaartumik suliaqarnermi eqqumaffigisariaqakkat, sullivimmi avatangiisit, pitsaassutsimik ukkataqarluni tunisassiorneq kiisalu aalisakkanik aggueriaatsit.

Powered by Labrador CMS