GUX Nuummiittumi timersuutigaluni ilinniagaqartoqarsinnaalerpoq

Inuusuttuaqqat timersortartut timersornikkut ineriartorluarnissaaat anguniarlugu GUX Nuuk, Kalaallit Nunaanni Timersoqatigiit Kattuffiat kiisalu Elite Sport Greenland suleqatigiinneratigut Nuummi timersornermik aallaqutaqaatigaluni GU-mi atuartoqarsinnaalerpoq.

Tigussaasumik oqaatigalugu, ilinniartoq periarfissaqalissaaq timersuummini anguniagalerluni immikkut piginnaasaminik ineriartortitsilluni sungiusarsinnaanngorlugu, tassunga ilutigitillugu ilinniarneq piffissaqarfigalugu naammasillugu, suleqatigiit tusagassiutinut nalunaaruteqarput.

Taamatut atuarniartut amerlanerpaamik 24-iussapput aggustimi 2015-imi aallartissallutik ilinniarnertillu naammassillugu soraarummeerfigalugu 2019-imi.

- Taama aaqqissuussinikkut inuusuttut ilinniakkamik aallussiitigalutik timersornermik angusaqarsinnaanissaat qulakkiissavarput. Taassuma saniatigut timersornikkut sungiusartarneq nukittorsarlugu immikkut piginnaanillit ukkataqarinerisigut, Kalaallit Nunaanni Timersoqatigiit Kattuffianni Allaffissornermi pisortaq Carsten Olsen oqarpoq.

Rektori qilanaartoq
GUX Nuummi rektorip Mikael Enggaardip suleqatigiinneq nuannaarutigaa. Tusagassiutinut nalunaarummi ima oqarpoq:

- Suleqatigiinneq, soorluttaaq GUX Nuummi ilinnartitaaneq elitesportilu ataqatigiissillugit ingerlanneqarsinnaanngornerat nuannaarutigaarput. Aallartinnissarput qilanaaraarput soorluttaaq ilinniartitaanerup ilusissaa aaqqissuullugu aallartereersugut, taanna GUX nalinginnaasoq assigalugu qaffasinnerusumik ilinniaqqinnissamut isissutaasinnaavoq.

Kikkulluunniit ilinniakkamut tassunga qinnuteqarsinnaapput, taamaattoq qinnuteqartut tamarmik ilimagissanngilaat akuerineqarnissartik piumassuseq annertooq pigineqartariaqarmat soorluttaaq timersuummi aallutami annertuumik pikkorisserusunnermik pigisaqartariaqartoq.

Piumasaqaatit gu-nuuk.gl-imi atuarneqarsinnaapput.

Piareersarfik aqqutigalugu marsip aallaqqaataata tungaanut qinnuteqartoqarsinnaavoq.