Ilinniarneq
GUX-mi ilinniartunut amerlasuut oqaatsit aporfigisarpaat
Ilinniarnertuunngorniartut amerlasuut oqaatsinik ajornartorsiornertik pissutigalugu ilinniarnertik naammassinngitsoortarpaat.
Kalaallit ilinniarnertuunngorniarfimmi ilinnialertartut affaannaat ilinniakkaminnik naammassinnittarput.
Ilinniarnermut Naalakkersuisoqarfimmit kisitsisit P1 Dokumentarip pissarsiarisimasaasa tamanna takutippaat. Qallunaatoorneq pissutaavoq. Tassa qallunaat oqaasii, DR.dk taama allappoq.
Qallunaat oqaasiisa tunulliunneqarnissaannut aalajangernerup inuusuttut ilinniaqqillutillu ilinniarnertuunngorniarusuttut eqqorpai.
- Uanga ilinniarnertuunngorniarfimmi tyskisut soraarummiissagaluaruma misigisassaraluara atuartut misigisaraat eqqarsaatigaara. Pitsaavallaarnavianngikkaluarpunga, Avannaani Ilinniarnertuunngorniarfimmi rektori Otto Simonsen oqarpoq.
Atuaruk: Doris Jakobsenip angutit ilinniartalertikkusuppai
Tuluit oqaasii
Ilinniarnermut naalakkersuisup Doris Jakobsenip (S) Kalaallit Nunaanni takornartat oqaasiini tuluit oqaasii salliutinneqassasut oqaatigaa.
- Tuluit oqaasii nunarsuaq tamakkerlugu oqaasiusut Kalaallit Nunaanni salliutinneqartariaqartut isumaqarpunga. Soorlu Danmarkimi nunanilu allarpassuarni taamaaliortoqartoq, Doris Jakobsen P1 Dokumentarimut oqarpoq.
Kisianni Otto Simonsen tassani isumaqataanngilaq.
- Qallunaat oqaasii tunulliunneqalerlutik tuluit oqaasii salliutinneqalerpata, ilinniarnertuunngorniarfimmi ukiuni tulliuttorpassuarni qallunaatut tuluttullu piukkunnanngitsunik atuartuuteqalissalluta isumaqarpunga, taanna oqarpoq.