Assammik arsarluni VM
Gudmundsson: Island kisiviat sammillugu
Qallunaat assammik arsartartut arfininngormat Polenimut ajugaanermik kingorna Qatar-imi assammik arsarluni VM-eqarnerani Island unammisussanngorpaat
Qatar-imi assammik arsarluni VM-eqarnreani Danmarkip ataasinngorpat 1/8-finalimi Island unammissavaa. Tamanna paasinarsivoq arfininngormat qallunaat gruppimi unamminermi kingullemri Polen 31-27-mik ajugaaffigimmassuk.
– Polenimut unamminerput nuannaarutigeqaara. Assersuineq saassussisarnerlu naammagisimaarpakka. Unammisartorpassuillu atorpavut, tamarmillu unammilluaqaat, taamaattumik tamanna pitsaasuuvoq.
– Unammiuaarneq maanna allanngortorujussuussaaq. Unammeriaaseq allaanerussaaq, tamannalu qilanaaraarput. Islandimiut sukalasuujupput, Polenimiunit allaanerusumik unammisarlutik, Gudmundur Gudmundsson oqarpoq.
VM sioqqutilaarlugu Danmark Islandimut unammigami 29-30-mik ajorsarnikuuvoq, ajorsaqqikkusunngillallu.
– Januaarimi Island unammivarput, pitsaavallaarsimanngiarlu. Pitsanngorsagassaqarpugut. Taktik-iliornerput iluarsissavarput. Taamanikkut unammilluarsimanngilagut, pitsaanerlersimaqaagulli, taanna oqarpoq.
Gudmundssonip, nammineq islandimiuusup, Islandip unamminissaa qilanaaraa, Islandimullu misigissutsiminik attorneqarusunngilaq.
– Tamanna ajornartorsiutiginngilara. Assammik arsarluni unammineruvoq, allallu tamaasa eqqarsaatiginngilluinnassavakka. Danmark kisiviat sammissavara, Gudmundsson oqarpoq. Gruppimi unamminermi qallunaat Saudi-Arabia, Rusland Polenilu ajugaaffigaat, Argentinamullu aammalu Tysklandimut naligiiginnartarlutik.
Gudmundsson sapaatiummat tusagassiortunik katersortitsinermi sivikitsuinnarmik peqataavoq apeqqutinut akissuteqalaaginnarluni, tamannalu tupigusuutigineqarpoq.
– Tatineqarneq pissutaanngilaq. Piffissaq-una pissutaasoq. Ullaassaq aatsaat sisamanut innarsimagama, nunanut allanut unammisartut sungiusaasuat oqarpoq.
Ataasinngorpat 1/8-finalimi Islandimut unammineq kitaata nalunaaqutaa malillugu nal. 17 aallartissaaq, unamminerlu pissaaq Doha-p avatinnguani Lusail Multipurpose Hall-imi.