Ilinniarneq
GU-mi ilinniartut Ilisimatusarfiup sukaterinera isornartorsiorpaa
Ilisimatusarfiup ilinniarnermik aallartitsinissamut piumasaqaatit sukaternerisa kingorna, Aasianni ilinniarnertuunngorniarfimmi ilinniartut mattunneqartutut misigipput,
Sermitsiaq.AG-imi qaammat kingullermi allaaserineqartutut, Ilisimatusarfiup ilinniakkani sisamani ilinnialernissamut piumasaqaatit sukateriffigaat: Ilinniarfissuarmi, isumaginninnermut siunnersortinmgorniarfimmi, peqqissaasunngorniarfimmi, kiisalu ilinniakkami oqaasilerineq, atuakkialerineq tusagassiutilerinerlu.
Piumasaqaatit nutaat 2017-imi ukiumi ilinniarfiusumi atuutilissapput.
Taassuma saniatigut ilinniarnertuunngorniarfinni ukioq ataaseq piukkunnarsartut Ilinniarfissuarmi aamma peqqissaasunngorniarfimmi ilinnialernissamik qinnuteqaqqusaajunnaarput.
Mattunneqartutut misigisut
Sukaterinissamik aalajangiisoqarnera Avannaani Ilinniarnertuunngorniarfimmi ukioq ataatsimi ilinniartunit isornartorsiorneqarpoq.
Ilinniartut eqqugaasutut misigipput, naak piumasaqaatit aatsaat aappaagut atuutilertussaagaluartut.
- Sooq uagut kisitta (ukioq ataaseq ilinniartut, red.) eqqugaassanersugut paaserusupparput, mattussaannginnissarpullu angorusupparput uaguummatami suliffimmik misilittagaqareersimalluta ingerlariaqqikkusuttut, Malina Skade Avannaani Ilinniarnertuunngorniarfimmi ukioq ataaseq ilinniartut sinnerlugit allappoq.
Atuaruk: Ilinniagaqalernissamut piareersarnermut pikkorissartitsisarneq unitsinneqartoq
Tusarniarneqarsimanngitsut
Taassuma aamma ilinniartut Ilisimatusarfiup sukaterineranut tunngatillugu aperineqannginnerat iluarinngilaa.
- Allannguutit pillugit aperineqannginnerput ilumoorsinnaanngilaq. Suliami isummagut tusaaneqarnissaat piumasaraarput, Malina Skade oqarpoq.