Grønlandsbanken sinneqartoorluartoq

Grønlandsbankenip 2014-imut naatsorsuutimini akileraannginnermi sinneqartoorutai 131,4 million koruunit 2013-imi angusanit amerlanerulaarput. Aningaaserivik ukiut pingajussaanik aktiamut ataatsimut 55-inik koruuninik sinneqartooruteqarpoq imaluunniit katillugit 99 million koruunit.

- Pitsaasunik sinneqartoorsinnaanerput iluarusuutigaarput, pingaartumik Kalaallit Nunaata aningaasarsiornerata ukiut tulleriit pingajussaanik sanngiitsutut inissisimanera eqqarsaatigigaanni, aningaaseriviup pisortaa Martin Kviesgaard oqarpoq.

Aningaaseriviup pisortaa malillugu sullitat suliffiuteqartut inissisimalluartut, sullitanut inuinnarnut niuerfiit annertusineri, kiisalu sinerissami immikkoortortaqarfiit ineriartortinnissaasa aallunneqarneri tunngavigalugit angusanik pilersitsisuupput.

- Aasianni immikkoortortaqarfiup ammarneqarnerata kingorna aningaaserivimmi sulisut amerlanerpaaffeqalerput, ukiorlu tamaat aningaaserivik tamakkerlugu ulapputtunnguaqarsimavoq. Illuutillit taarsigassarsiaminnik aatsaat taama allanngortitsisimapput, amerlanerujartuinnartullu pappilissanik nalilinnik pisiortorsimallutik, aningaaseriviup pisortaa oqarpoq oqarpoq.

2014 allanngorarfiusoq
Martin Kviesgaard ilisimatitsivoq 2014 ukiuusimasoq immikkut ittumik allanngorarnermik sunnerneqarsimasoq. Taarsigassarsisitsinerit qularnaveeqqusiinerillu ataatsimut isigalugit amerliartorput, sullitalli suliffeqarfiutillit aningaasaliissuteqarnissaminnut tunuarsimalaarsimapput, tamannalu ukiup naalernerani taarsigassarsisitsinerit ikilinerinik kinguneqartarluni. Paarlattuanik inuinnaat sullinneqarneri annertusisimapput.

Grønlandsbankenip taarsigassarsisitsinernut nalikilliliisarnera qaffakkiartorpoq, annaasalli procentia 0,7 procentiusoq suli ingasagisassaanngilaq.