inuussutissarsiutit
Grønlandsbankip isertitai ikilerialaarput
Grønlandsbankip kvartalimut isertitai 21,4 millioner koruuniupput, siornalu piffissamut tassunga sanilliullugu ikinnerupput.
Grønlandsbankip tunngaviusumik ingerlatsinermigut ingerlalluarpoq. Nunatsinni aningaaseriviit annersaat ullumi taama nalunaaruteqarpoq, kvartalimut siullermut naatsorsuutit, siorna kvartalimut siullermut sanilliullugu 4 millioner koruuninik annikinnerusunik isertitsiffiusimasut, saqqummiunnerannut atatillugu.
Kvartalimut siullermut naatsorsuutit ilaatigut takutippaat erniatigut isertitat 2015-imi kvartalimut siullermut sanilliullugit 2,5 %-imik appariarsimasut.
Tamatumunnga pissutaasut ilaatigut ilagaat obligationitigut isertitat ikileriarsimanerat Nationalbankillu aningaasartuutaasumik erniaqartitsinera.
Inuiaqatigiinni siuariarnissaq naatsorsuutigaa
Piffissami 2012-imiit 2014-imut Kalaallit Nunaata naalagaaffimmi tunisat ataatsimut nalingat amigartooruteqarfioreersoq aningaaserivik naliliivoq 2015-ip ingerlanerani akit ilorraap tungaanut aallarsimasut, ukiumilu tunisat isertitalllu nalingisa nikinganerat naammaginartuusoq.
Aningaaseriviup naatsorsuutigaa Kalaallit Nunaanni naalagaaffimmi tunisat ataatsimut nalingat aamma 2016-imi qaffariarumaartut, ilaatigut pissutigalugu naatsorsuutigineqarmat annertunerusumik sanaartortoqassasoq raajartassiissutillu qaffanneqarumaartut.
2015-imit angusarissaarnerussaaq
Taamaattumik Grønlandsbankip ukiumut naatsorsuusiorfiusumut 2016-imut, aningaasat nalingisa iluarsineqannginneranni nalikilliliissuteqannginnermilu, 125-145 mio. koruuninik angusassarisatut naatsorsuutigisani aalajangiusimavaa.
Siorna isertitat 136,8 mio. koruuniupput.