inuussutissarsiorneq
Grønlandsbankip dollarit itigartitsissutigigai
Amerikamiut aningaasaat sinimikkut kusanaallisimasunik qalipaateqarneri pissutigalugit, sanaluttartut arlallit aningaasat pineqartut najukkaminni maani aningaasanut taarsertissinnaanngikkitik oqaatigaat. Inuussutissarsiortut nunani allamiut aningaasaat tigusatik isornartoqartittassagaat, Grønlandsbankimit aalajangiusimaneqarpoq
– Aningaasat salloqittaatit pineqanngillat. Pineqartulli tassaallutik dollarsivissuit simerneqalaartut. Simernerit ilaat mikisuararsuupput erseqqarlullutillu. Aasaanerani ukiaaneranilu umiarsuarnut takornariartaatinut ilaallutik takornariartut akiliutigisartagaannit 8.000 koruunit sinnerlugit pissarsiaraakka. Aningaasat taamaattut Grønlandsbankimit itigartitsissutigineqarsimanerat tusarsimanngisaannarpara.
Sanaluttartoq Frederikke Berthelsen Sisimiuneersoq taama oqaluttuarpoq. Taanna umiarsualivimmi illuaqqamit umimmaat qiviuinit puisillu amiinit suliaminik aasat tamaasa tuniniaasarpoq.
Bankimit itigartinneqarpoq
- Nunani allamiut aningaasaat tigusartakkakka qaammatini marlunni-pingasuni katersuinnarsimavakka, maanilu aningaasanut taarsertinnissaat utaqqisillugu, tassa taarsiisitsinermi akiliutaasartoq sipaagaqarfigerusukkakku. Aningaaserivimmulli saaffiginnikkama aningaasat sakkortuunik qullilerlutik misissorpaat, taavalu oqarfigineqarlunga aningaasat taarsertissinnaanngikkikka. Aningaasat taarsertinniakkakka eurot 2.000 koruunit sinnerlugit aamma dollarsit 6.000 korunnit sinnerlugit naleqaraluarput, oqaluttuarpoq.
Sanaluttartut arlallit dollarsinik simernilinnik aamma akiliiffigineqartarsimasut. Aningaasat pappilissat tamakku sanaluttartut amerlanerit feeriarnerminni nassarpaat imaluunniit Danmarkimi taasertissimallugit. Grønlandsbankimili aningaasat tamakku tigujumaneqannngillat.
Danmarkimi taarsertissavai
Tamanna Frederikke Berthelsenip tupigusuutigaa, nunanilu allamiut aningaasaat pigisani aningaasaasiveeqqamut maanna toqqortarai, neriuutigalugulu tullianik Danmarkimukaruni taarsertissinnaassallugit.
– Tamanna ajorluinnartutut isigaara. Grønlandsbankimmi tusagassiuutitigut allagarsiinikkulluunniit mianersoqqussutigisimanngilaa. Tamatumami kinguneranik 8.000 koruunit atorsinnaannginneragaat tigummiinnalerpakka. Sinerissami aamma inoqassajunnarsivoq aningaasanik taamaattunik tigusaqarsimasunik uattullu inissisimasunik, Frederikke Berthelsen oqarpoq.
Allaaserisaq tamaat Sermitsiami kingullerimi atuarsinnaavat. Uani pisiarineqarsinnaavoq: