qiimmattarneq

Grønlandsbanken ukiuni marlunni kingullerni naatsorsuutinik aatsaat taama pitsaatigisut

Kalaallit suliffeqarfiutaannut aningaaserivik aningaasanik amerlanerusunik atukkiisalerniarpoq

Grønlandsbankenip pisortaa Martin Kviesgaard nipitusaarluni qiimmattartartutut ilisarisimaneqanngilaq. Kisianni kvartalimut naatsorsuutit saqqummiunneqaqqammertunut tunngatillugu qungujulaarsimanissaa qularnanngilaq.

Atuaruk: Grønlandsbankeni misilitsinnermini qaangiilluarpoq

Siuariartuinnarneq
Aningaaseriviup kvartalimut naatsorsuutit tunniuteqqammerpai, taakkulu ukiuni marlunni kingullerni aatsaat taama pitsaatigipput, kvartalip pingajuanni akileraartinnani angusat 34,7 millionit koruuniummata.

- Eqqarsaatigigaanni aamma aningaasanik niuerfiusumi ernialiussat appasissorujussuullutik minusimiinnerat aammalu nalit annaasaqarfiginerat pisarnernit qaffasinnerulaaraluartut, soorunami naammagisimaarparput ingerlatsinitsinni tunngaviusumik aningaasartuutigut annertussutsikkut tigummiinnarsinnaasimagatsigit, Martin Kviesgaard oqarpoq.

Atukkiussinerit amerlanerusut
Grønlandsbankenip ukiumut siulianut sanilliullugu ukioq manna aningaasanik amerlanerusunik atukkiisimanini naammagisimaarpaa. Saniatigullu atukkiussinermini aningaasat ikinnerusut annaasimavai.

- Nalunngilarpummi taamatut pisoqarnissamut suliffeqarfiit iluini periarfissaqartoq, Martin Kviesgaard oqarpoq.

- Naqqami tikivillugu Kalaallit Nunaanni 100 procentimik aningaaseriviuvugut, taamaattumillu suliffeqarfiit amerlanerit alliartornissaat sulilu annertunerusumik aningaasalersuinissaat peqataaffigerusupparput, taanna itisiliivoq.

Aalisarneq, takornariaqarneq aamma sanaartorneq
Taassuma aalisarneq ineriartornermut annertuumik pilersitsisuusutut isigaa, kisianni aamma takornariaqarnermik sanaartornermillu ineriartitsineq ingerlalluartoq.

Aammattaaq kommunit illoqarfinni pingaarnerni suliffeqarfiit namminersortut ineriartortinnerinik aallussinerulersimanerat nersualaarutigaa.

- Aningaasalersuinerni malunnaatilimmik akuliutsinneqarutta inuussutissarsiornerup suliffissaqartitsinerullu iluini ineriartortitsinernut peqataassaagut, taamatullu pisoqassappat tamanna aamma aningaaserivimmut iluaqutaalluartumik malitseqassalluni, Martin Kviesgaard naqissusiivoq.

Powered by Labrador CMS