naatsorsuutit
Grønlandsbanken aatsaat taama taarsigassarsisitsigaaq
Grønladnsbankenip ukiumut naatsorsuutini saqqummiuppai, taanna 113,4 millionit koruuninik sinneqartoornermik angusaqarpoq, ukiup siuliani 106,6 millionit koruuniusimallutik. Saniatigut aningaaserivik ilisimatitsivoq aatsaat taama taarsigassarsisitsineq annertutigisoq, tamannalu inuussutissarsiornermi ingerlalluartoqarneranik takussutissaasoq
Naatsorsuutit naammagisimaarneqartut aningaaseriviup tusagassiuutinut nalunaarummi oqaatigaa.
- Naatsorsuutit takutippaat, aningaasaqarnikkut, uninngasuutitigullu isumannaatsumik inissisimanerput suli attakkipput. Kisianni nuannaarutiginerpaasarput tassaavoq oqaluttuarisaanermi aatsaat taama taarsigassarsisitsisimatigigatta. Ingammik ukiup sisamararterutaani kingullermi sulisugut ulappussimapput. Soorunami taama ineriartorneq iluarisimaaqaarput, tamatumami takutippaa Kalaallit Nunaanni aningaasaliisarnerit ingerlalluarnerulersimasut, aammalu unammillersinnaassuseqartugut, niuernerlu eqqarsaatigalugu pitsaasumik inissisimasugut, Grønlandsbankenimi pisortaq Martin Kviesgaard oqarpoq.
Pitsaasumik ingerlanerup 2017-imi ingerlaannarnissaa aningaaseriviup naatsorsuutigaa, aningaaserivik ukiormanna ukiunik 50-inngortorsiorpoq, tamannalu aggustimi malunnartinneqassaaq.
Ernianit isertitat unammillernartut
Ernianit isertitanit annikillisunit aamma obligationinit erniaannit isertitanit ikinnerusunit aniingaaserivik unammilligassaqarsimalluni ilisimatitsivoq.
Paarlattuanilli annaassat aamma sullitat taarsigassarsiaannut annaasat ikilisissimavai, tamanna aningaaseriviup tusagassiuutinut nalunaarutaani ilisimatitsissutigineqarpoq.
Aningaaseriviup naatsorsuutigaa aningaasat nalingisa allanngorarnerat nalikilliliinerillu allanngunngippata 125 – 145 millionit koruuninik sinneqartoornissani, tamannalu 2016-imut aamma naatsorsuutigineqarsimavoq.
Kisitsisit pingaarnerit
- Akileraannginnermi angusat: 113,4 millionit koruunit
- Aningaasat nalingisa allanngorarnerat nalikilliliinerillu peertinnagit sinneqartoorutit 140,3 millionit koruunit
- Taarsigassiissutit: 3,1 milliardit koruunit
- Aningaaserivimmiittuutit: 4,8 milliardit koruunit
- Aningaasat katinneri: 9,1 milliardit koruunit
- Uninngasuutit erniaat: 13,4 procentiupput