Greenpeacep Rusland isumaqatigiinniarfigaa

Avatangiisinik illersuiniaqatigiiffiup suut tamaasa atorlugit Greenpeacep umiarsuaani Arctic Sunrise-mi inuttat iperagaatinniarpai

Greenpeace' topchef, Kumi Naidoo, lod sig fotografere med den russiske polarforsker og præsident Vladimir Putins særlige Arktiske rådgiver, Artur Tjilingarov.

Greenpeacep umiarsuaani tigusarineqarsimasumi Arctic Sunrisemi inuttat 28-t assiliisullu marluk Ruslandimi suli parnaarussaaqqasut, nunat tamalaat avatangiisinik illersuiniaqatigiiffiata pisortaanerata Kumi Naidoo-p tamaviaarluni iperagaatinniarpai.
Islandip illoqarfiisa pingaarnersaanni Reykjavikimi ataatsimeersuarnermi Arctic Circle-mi Kumi Naidoo-p naapippai russeq issittumi ilisimasassarsiortartoq præsident Vladimir Putin-illu issittumut tunngasuni siunnersortaa Artur Tjilingarov, Sovjetunion-eqarallarmat Ruslandimi Greenpeacemik pilersitseqataasimasoq, aamma Ruslandip inatsisartuisa Duma-p oqaaseqartartua Mikhail Slipenthuk.
Tassani Greenpeacep pisortaata neqeroorutigaa Ruslandimut aallarniarluni apeqqut russit oqartussaasuinik qaninnerusumik oqaloqatigiissutiginiarlugu, soorluttaaq allakkat, sapaatip akunnerani kingullermi præsident Putin-imut nassiussani innersuussutigigai, taakkunatigut neqeroorutigalugu Ruslandimut aallarniarluni akerliuniat parnaarussat iperagaanerannut taartaaniarluni.
– Taskkua qanorlu pisoqarnissaa ernumagisorujussuuvarput. Sapinngisarput tamaat iperagaatinniarpavut aallartitanik isumaqatigiinniuteqarluta, soorlu Arctic Circlemi russit aallartitaannik, Kumi Naidoo Ritzau-mut oqarpoq.
Kumi Naidoop suli paasisinnaanngilaaq Arctic Sunrise-p qanittukkut akerliuniarneranut Rusland sooq taama sakkortutigisumik qisuariarsimasoq. Qaammatit 13-it matuma siornatigut tassunga assingusumik Det Arktiske Oceanimi qillerivimmut Priraslomnaija-mut akerliuniarnermi peqataasimavoq.
– Taamani russit sinerissamik nakkutilliiviannit malinnaaffigineqaannarpugut. Uanga qillerivimmut qaqivunga akunnernilu marlussunni kalunnernik pitullunga, tamatumalu kingorna tamaanngaanniit qimagutsiinnarneqarpugut. Taamaattumik paasisinnaanngilara russit sooq taama sakkortuuliortiginersut, Kumi Naidoo Ritzau-mut oqarpoq.
Greenpeacemi akerliuniat ilaat unnerluutigineqartoq, qallunaaq 26-nik ukiulik Anne Mie Roer Jensen, Marstal Navigationsskolimi umiarsuup naalaganngorniarpoq, parnaarussivimmi ilinniutinik pisimavoq. Taamatut angutaa Kumi Naidoo-mut oqaluttuarpoq, tallimanngormat oqaloqatigiikkamik.
– Ilaqutaasut soorunami ernumapput, aamma uagut ernumavugut tamarmik iperagaanissaata tungaanut, Kumi Naidoo erseqqissaavoq.

Powered by Labrador CMS