Uuliasiorneq

Greenpeace nutaamik uuliamik ujaasisoqarnissaanik ernumassuteqartoq

Norgemiut seismiskemik misissuinerat, Namminersorlutik Oqartussat arferit aamma aarrit illersorniarlugit pilersitaata eqqaanni ingerlanneqartoq, avatangiisinik illersuiniaqatigiiffik aarlerisaarivoq

Norgemiut ingerlatsiviat TGS-NOPEC aamma ukioq manna seismiskemik Tunup Avannaata imartaani uuliamik aamma gasimik ujaasinermut atatillugu misissueqqinniarpoq.

Avatangiisinik illersuiniaqatigiiffik Greenpeace, Aatsitassanut Ikummatissanullu Aqutsisoqarfimmik issuaalluni taama nalunaaruteqarpoq.

Ajuusaarnartoq
Ingerlatsiviup ukiup aappassaanik misissuinini ingerlatilerpaa. Greenpeacemilu ernumanermik pilersitsipput, avatangiisinik illersuiniaqatigiiffik naapertorlugu, Namminersorlutik Oqartussat qilalukkat, aarrit aammalu arfiviit spitsbergenimeersut navianartorsiortinneqartut illersorniarlugit pilersitaanni misissuinerit ingerlanneqarmata.

- Ukioq manna aammaarluni pinngortitami ataqatigiittut immikkuullarissut, illersorneqarnissamik nalunaarsorneqarsimasut, sakkortuumik aamma ulorianarsinnaasumik uuliasiortunit sapaatip-akunnerini arlalinni nipiliorfigineqarnissaat ajuusaarnartupilussuuvoq, Greenpeacemi suliniummi pisortaq, Sune Scheller tusagassiorfinnut nalunaarummi erseqqissaavoq.

Atuaruk: Greenpeacep umiarsuaa nunatsinnut

Nipiliuutit
Seismiskemik misissuinerit umiarsuarmit batteriit nipiliuutit atorlugit ingerlanneqartarput, tassani qanngornernik sakkortuunik immap qaavata atinnguani pilersitsisoqartarpoq, immap naqqani uuliamik aamma gassimik ujaarlernermut alloriarnertut siullertut.

Taamatut 'piffimmi ajornartorsiorfimmi' misissuisoqaannarnissaanik nutaarsiassaq, Citronen Fjordimi piaaffimmi akuersissummik suliaqarneq peqatigalugu takkuppoq, tassani zinkimik aamma aqerlumik Nunatsinni nunami allanngutsaaliukkami piiaasoqarniarpoq.

Greenpeace piiaaffimmut akerliussuteqanngilaq, kisiannili piffik qaqugukkut illersugaanersoq aamma suliniutit sorliit mianersugaatsumik akuerineqartarnerinik malittarisassanik ersarissunik maqaasisaqarpoq.

Piffiit pingaarutillit
- Kalaallit Nunaanni suliniutinut inissaqartitsisoqassaaq ineriartornermik qulakkeerisussanik, avatangiisinut innimiginnilluni, kisianni piffinni pinngortitamik illersukkatut toqqarneqarsimasuni, sunik akuersisoqarsinnaaneranik malittarisassanik ersarissunik maqaasisaqarpugut. Iluaqutaanngilarmi pappiliaannakkut illersuineq qulakkeerneqarnissaa, saniatigullu uumasut navianartorsiortut aamma pinngortitami qajannartumi minnerpaamilluunniit aatsitassanut periarfissamik takugaanni, avatangiisinut innimiginninnerit tamaasa soqutiginagit iliortoqarsinnaanngilaq, suliniummit pisortaq ilanngullugu oqarpoq.

Powered by Labrador CMS