akiliisinnaajunnaarneq
Greenland Venturemi sukaterineq
Aningaasanik aqutsinerlunnerit akiliisinnaajunnaarnerillu nuanniitsut kingorna suliffeqarfiit Greenland Venturemit, aningaasaliisarfimmit, aningaasaliiffigineqarsimasut nakkutigineqarnerulissasut aningaasaliisarfimmit nalunaarutigineqarpoq
Suliffeqarfiit arlariit ukiuni kingullerni akiliisinnaajunnaarnerat, akiligassarpassuaqarnerat aningaasanillu aqutsinerlunnerat pissutigalugit Namminersornerullutik Oqartussanit eqqartuussivimmi suliassanngortitsisoqarnera tusagassiuutini eqqartorneqalerpoq.
Suliffeqarfinnut assigiissut tassaavoq suliffeqarfiit Namminersorlutik Oqartussani aningaasaliisarfimmit Greenland Venturemit tamakku suliniutaannut aningaasaliisoqarsimanera siulersuisunilu ilaasortaatitaqarnerat.
2013-imi februaarimi inuussutissanik tunisassiorfik Arctic Green Food 17,8 millioner koruuninik akiligassaqarluni akiliisinnaajunnaarpoq. Pisoq tupaallaatitsivoq, tassami suliffeqarfiup akiliisinnaajunnaarnera qaammatinik marluunngitsunilluunniit sioqqullugu suliffeqarfik taanna pisortanit 4,9 millioner koruuninik tapiiffigineqarsimavoq.
2013-imi oktobarimi immiorfeeraq Nanoq Beer 2,5 millioner koruuninik akiligassaqarluni akiliisinnaajunnaarpoq. Tamatumunnga ilanngullugu suliassaq inatsisitigut kinguneqartinneqarsinnaasoq, tassami immiorfeeqqamik ingerlatsisut imigassamut akitsuutit ingerlatseqatigiiffiup atuunnerani Namminersorlutik Oqartussanut nalunaarutigineqarsimaneraat nalorninartorujussuummat.
Allaaserineqartoq Sermitsiami atuarneqarsinnaavoq: