Greenland Express Air
Greenland Express Airip tusatsiakkat ilumuunnginnerarpaat
Timmisartuutileqatigiiffimmut inniminniinerit naatsorsuutigisamit ikinnerugaluartut Gert Braskip qularnaarpaa juunip aappani timmisartuussinerit aallartinnissaat
Timmisartuutileqatigiiffik Greenland Express Air juunip aallaqqaataanit timmisartuussisinnaannginnera ilumuunngitsoq Gert Braskimit naqissuserneqarpoq.
Naak tuluttuumi allaqqasumi oqaatigineqaraluartoq 'Greenland Express delays launch citing paperwork issues' Greenland Express Airip timmisartuussisalernissaa kinguartittariaqartoq. Timmisartuutileqatigiifiup timmisartoq attartugaa Fokker-100-p timmisartuussinissamut piareersarneqarnera kinguaattoorfiunera pissutaalluni timmisartuussinerit kinguartinneqassasut ilaatigut allaqqalluni.
- Greenland Express Airimik aallarnisaasoq pisortarlu Gert Brask, tuluttut allaqqasoq qanoq ilumoortigaa?
- Apriilikkunnili taakku attaveqarfiginikuunngilagut, aamma uagut pilluta allaaserisaq ilumuunngilaq.
- Juunip aappaani timmisartuussisalernissarsi suli pilersaarutaava?
- Aap, juunip aappaanit aallartittumik timmisartuussisoqartalernissaa naatsorsuutigaarput. Ullormi siullermi attartorneqarneratigut angalasoqassaaq. Juunip pingajuanit nalinginnaasumik timmisartuussinerit aallartinneqassasut naatsorsuutigaarput.
- Piumasaqaatit malitassat atortullu piffissaq eqqorlugu naammassineqareersimassappat?
- Angallassinissatsinnut piumasaqaatit naammassineqareerput, timmisartorlu maajip 30-ani Aalborgimut tikissalluni.
Inniminniinerit
- Inniminniinerimmi naammaginartumik ingerlappat?
- Nittartakkatsinni inniminniinermut atortorissaat ajoqquteqarnera pissutaalluni naatsorsuutigisatsinnit inniminniinerit ikinnerupput. Tamannali mumikkumaartoq naatsorsuutigaarput.
- Qanoq amerlatigisunik inniminniisoqareerpa?
- Unammilleqatigiittoqarnera pissutaalluni tamanna oqaatigisinnaanngilara, Gert Brask oqarpoq.