Greenland Express Air
Greenland Express Airip timmisartuutileqatigiiffik suleqataa oqaaseqarumanngitsoq
Timmisartuutileqatigiiffiup suleqataa hollandimeersoq Denim Air ACMI Sermitsiaq.AG-imut aningaasarliortoqarnera oqaaseqarfigiumaneqanngitsoq
- Maannakkut assut artornarsivoq. Timmisartumik attartortitsinitsinnit nunatta kujataaniillu timmisartoq ulikkaartarlugu angallassinitsinnit isertitagut ingerlaannartumik - ilaatigullu suli isertinneqanngitsut – atortariaqarsimavagut, ingerlatitsisutta Denimip suliassat angumerisinnaanngimmagit.
Greenland Express Airip pisortaanera Gert Brask KNR-ip Radioaviisianut oqarpoq.
Sermitsiaq.AG-ip timmisartuutileqatigiiffik Denim Air ACMI tamanna pillugu pissarsiariniaraluarpaa. Timmisartuutileqatigiiffiup hollandimeersup pisortaanera Ronald Janssen saaffigiuminartaraluartoq pissarsiarineqarsinnaanngikkallarpoq.
Aallartilluaraluarneq
Greenland Express Air sivisuumik aallartinniareerluni juunimi angallasserngaarpoq. Ronald Janssenip aallartinneq neriuuteqarfigalugu oqarpoq.
- Greenland Express Airimut timmisartumik nutaaliaasumik attartuissaagut, timmisartumilu sulisorineqartut pitsaasut sullississallutik, Janssen allappoq.
Tamannalu Gert Braskip iluarisimaarpaa.
- Timmisartoq 100-nik issiaveqartoq pitsaasuuvoq, aningaasaqarnerpullu ingerlalluarpoq, aallartinngilaataa Gert Brask oqarpoq.
Greenland Express Air Danmarkimi Islandimi Nunatsinnilu angallassilluni juunip 17-ani aallartippoq.
Gert Braskili ulluni kingullerni nalunaaruteqarpoq timmisartuutileqatigiiffik aningaasatigut ajornartorsiuteqartoq. Tassunga Denim Air ACMI peqqutaasoq oqarpoq.
- Maannakut tamaviaaqaagut. Ikiornissaqarnissarput pisariaqartipparput. Angalanissanik allanngortitsinernut 2,8 millioni koruunit, akiliutigisanillu utertitsinitsinnut 1,9 millioni koruunit akiliutigereerpagut, pisortaq neriuutaarussimarpaluttoq oqarpoq.
Sianeqqikkisi
Sermitsiaq.AG tamanna pillugu Denim Air ACMI-mut paasiniaagaluarami iluatitsinngilaq. Aaqqissuisoqarfimmit Ronald Janssen saaffigineqartaraluarpoq, akeqqinnerlu ajorpoq.
Aamma Denim Air ACMI-mi sulisut tunuarsimaarput.
Greenland Express Airip aningaasaqarnikkut ingerlanerlunnera oqaatigineqarmat tupaallaqqaarput. Aamma tassunga Denim Air ACMI pissutaasinnaanera paasiuminaatsinneqarluni.
Sermitsiaq.AG- minutsit qulini tulliuttuni sianeqqissasoq siullermik oqarfigineqarpoq. Sianeqqimmallu sapaatip akunnerata tulliani aatsaat sianeqqissasoq oqarfigineqarluni.