Greenland Express Air
Greenland Express Airip timmisartussaa Aalborgimut mippoq
Timmisartuutileqatigiiffiup timmisartoq attartugaa siullermeerluni Danmarkimut ullumi ataasinngornermi mippoq
Greenland Express Airip timmisartoq attartugaa Aalborgimut nalunaaqutaq danskit nalunaaqutaat malillugu 12.20 mippoq.
Timmisartoq Hollandimeersunit Denim Air ACM-imit pigineqarpoq.
Timmisartuutileqatigiiffimmi pisortaq aallarnisaasorlu Gert Braskip timmisartup minnera uppernarsarpaa.
- Timmisartoq meqqammerpoq. Taamaammat suliassaqaaluppugut. Timmisartoq pillugu annertunerusumik oqaaseqarsinnaanngilanga, ullulli ingerlanerani nalunaaruteqaqqikkumaarpugut, Gert Brask Sermitsiaq.AG-mut oqarpoq. Paaserusunneqarpoq qaqagu timmisartoq ilaasoqarluni angallassiumaarnersoq, tamannalu kingusinnerusukkut nalunaarutigineqassaaq.
Timmisartoq Fokker-100
Timmisartuutileqatigiiffiup timmisartoq Fokker-100 inunnik 100-nit ilaasoqarsinnaasoq Denim Air ACMI-mit attartorpaa. Brasiliamiut timmisartuutileqatigiiffiannit TAM-imit 1995-imi atorneqaqqaarpoq, timmisartorlu Kalaallit Nunaata, Danmarkip Islandillu akornanni angallassisassaaq.
Timmisartoq Denim Air ACMI-mit aqunneqassaaq, timmisartumili sulisut Greenland Express Airimit aqunneqassallutik.
ASSI TAKUUK: Timmisartoq Maastricht-Aachen Airportimit ataasinngormat aallarmat assilineqartoq.
Greenland Express Air pillugu allaaserineqartut allat takukkit