Greenland Express Air
Greenland Express Airip siunnersortaa Aatsitassanut Aqutsisoqarfiup akerlilerpaa
Greenland Express Airip sapaatip akunnerani kingullermi tamanut saqqummiuppaa Würbanip piginneqatigiissutit 35 procentii pisiarisimagai. Taanna aningaasaliissuteqarnermik ingerlatsiviuvoq, aningaasaliisunilu iluanaaruteqarujussuarnissaannik neriorsorpai, taassumalu siunnersortaa Aatsitassanut Aqutsisoqarfiup malersorpaa
– Würban, Greenland Express Airimut aningaasaliivoq. Greenland Express Airip piginneqatigiissutit 35 procentii Würbanimut tunmivai, sinneri 65 procentit kalaallit pigiinnarpaat.
Tusagassiorfinnut nalunaarummi, Greenland Express Airip Würten peqatigalugu sapaatip akunnerani kingullermi nassiussaanni ilaatigut taamatut allassimavoq. Tusagassiorfinnut nalunaarummi allassimavoq Würtenip Greenland Express Airimik piginneqataalerneranik isumaginnittuusimasoq selskabip investment banker-iatut taaneqartoq Nicklas Hoffmann.
Paasissutissiissutigineqanngitsoq tassaavoq qallunaaq taanna, Thailandimili najugalik, ingerlatarpassuaqartoq. Islamisk finansieringimik aamma Bruxelles Lufthavnimi tikittarfimmi, aallarniutaasumik isumaqatigiissutit pimoorussaanngitsut atorlugit, nammineq selskabia Axoso atorlugu kuultinik tuniniaasinnanermik pikkorissartitsinermik neqerooruteqarnermi saniatigut, Nicklas Hoffmann Würtanip imminut nittarsaannersuanik isumaginnittuuvoq.
Annoncitigut selskabi neriorsuivoq aningaasaliisut minnerpaamik 15 procentimik iluanaaruteqassasut. Tassa qaammammuinnaq, taamaasillunilu aningaasaliiffik iluanaarnartorujussuusimavoq. 1.000 koruuninik aningaasaliigaanni ukiup ataatsip ingerlanerinnaani iluanaarutissat 4.000 koruuniussapput.
Würtenip siunnersortaa Aqutsisoqarfiup ilisimanngilaa
Aatsaalli siullermeersumik Nicklas Hoffmann Kalaallit Nunaannik samminnilinngilaq. Linked-IN-imi profilia naapertorlugu taassuma qallunaat kalaallillu naalakkersuisui sinnerlugit nunatta ataani aatsitassarsiornissamik qinnuteqaatit suliarisarpai.
Taamatut paasissutissiinera Aatsitassanut Aqutsisoqarfimmi immikkoortoqarfimmi pisortap Søren Sohn Krog Pedersen sakkortunerpaamik tunuartippaa:
– Taassuma Linked-IN-profilia malillugu isumaqartoqarsinnaavoq Nicklas Hoffmann aatsitassanik atuinissamut qinnuteqaatinik pisortatigoortumik Danmarki Kalaallillu Nunaat sinnerlugit suliarinnittartuusoq. Tamanna ersarissumik kalaallit tungaannit tunuartipparput, Nicklas Hoffmann aamma Aatsitassanut aqutsisoqarfik imminnut attuumassuteqanngilluinnarput.
Søren Sohn Krog Pedersen naapertorlugu Würbanip siunnersortaa ilisimanngilluinnarpaat:
– Ateq Nicklas Hoffmann Atsitassanut Aqutsisoqarfimmi ilisimanngilarput. Aamma attuumassuteqarfigisimanerlugu allagaativut misissorsimaavgut. Aamma tamatumunnga takussutissaqanngilaq. Soorunami tamakkiisumik tunuartissinnaanngilarput Nicklas Hoffmann aatsitassarsioqatigiiffimmut, Kalaallit Nunaanni soqutigisalimmut, assersuutigalugu siunnersortitut arlaatigut attuumassuteqarsimasoq. Aammattaarli tamatumunnga atatillugu taanna aqqaluunniit siusinnerusukkut naammattoorsimanngilarput.
Akisoqarneq ajorpoq
Sermitsiaq.AG-p arlaleriarluni Würban Nicklas Hoffmannilu attaveqarfiginiartaraluarpai, ilaatigulli selskabip Sydafrikami qullersaqarfianut telefonikkut saaffiginnissutit akineqarneq ajorput.
Greenland Express Airip pisortaanera Gert Brask sivisuumik Sermitsiaq.AG-mit apersorneqartarusussimanngilaq. Tamanna qaammammi mataumani siusinnerusukkut oqaatiginikuuvarput. Sermitsiaq.AG-p malartaaserluni Greenland Express Air oqaloqatiginiartassavbaa.
Würbanip annoncia ataani takuuk