Greenland Express Airip angallasserngaanissaa kinguartittoq

Pilersaarutit malillugit Greenland Express Air ilaasunik timmisartuussinissaa pisussaagaluartoq kinguartippoq.

Tamanna pivoq pingasunngornermi misiliummik angalanerani paasinarssisimammat timmisartoq teknikkikkut ajornartorsiuteqartoq.Taamaammallu ataasinngorpat junip aappaani attartorneqarluni Aalborgimiit angallassinissaralua siulleq kinguartinneqartussanngorpoq.

Tamanna Greenland Express Air ApS-imi pisortamit aammalu aallarniisumit, Gert Brast-imit nalunaarutigineqarpoq.

- Ajoraluartumik Demin Air ACMI-mit hollandimeersumit ilisimatinneqarpugut, timmisartoq ataasinngorpat ullup qeqqanut aatsaat tikissinnaasoq, misiliummik timminermi teknikkikkut ajornartorsiuteqarsimammat. Taamaammallu timmisartup qalipanneqarnissaa kinguartilluni, aatsaallu ataasinngorpat ullaakkut naammassissalluni. Qalipanneqarnera naammasseriarpat piaartumik Aalborgiliaanneqassaaq, Gert Brast ilisimatitsivoq.

Ataasinngornermi attartorneqarluni timmisartuussinissaralua Aalborgimiit Keflavik aqqusaarlugu Kangerlussuaq, Narsarsuaq, Akureyri kiisalu København aqqusaarlugu pisussaagaluarpoq. Kingornalu junip pingajuani nalunaaqutaq 23.55 Aalborgimut utertussaagaluarluni.

Maanna naluneqarpoq qaqugu timmisartuussisinnaassanersoq.

- Qaqugu Greenland Express Airip timmisartuussinera siulleq pisinnaanissaa naatsorsuutigaauk?

- Ajoraluartumik tamanna Demin-imit tusagaqartinnanga akisinnaanngilara. Timmisartussamaateqarpugut, taamaattorli ataasinngorpat tusagaqarnissaq utaqqeqqaartariaqarpapput angalanissamik paasissutissanik tunniussiniarutta, Gert Brast akivoq.

Marlunngormat allaaserisaq ’Greenland Express delays launch citing paperwork issues' Gert Brastip ilumuunngitsoq Sermitsiaq.ag-mut oqaatigaa. Taamaattorli erserpoq ataasinngorpat Greenland Express Airip timmisartuussinissaralua kinguartittoq, timmisartut Fokker 100-up piareersarneqarnera kinguaattoormat.

- Nittartagaq pineqartoq aprilimili attaveqarfiginikuunngilarput, Gert Brast oqarpoq.