Thule Air Base
Greenland Contractorsip Thulemut isumaqatigiissut sivitsorsinnaavaa
MT Højgaardip uppernarsarpaa Thulemi sakkutooqarfimmut Greenland Contractorsimik isumaqatigiissutip sivitsorneqarnissaa US Air Forcep kissaatigigaa
Kalaallit-qallunaat selskabiata Greenland Contractorsip Thule Air Basemi (Pituffimmi) ingerlatsineq aserfallatsaaliinerlu qanittukkut tigoqqissinnaavaa.
Entreprenøritut ingerlatsivissuup MT Højgaardip uppernarsarpaa US Air Forcep oqaatigisimagaa Greenland Contractorsimik, MT Højgaardimit nunatsinnilu namminersorlutik oqartussanit pigineqartumik, isumaqatigiissut sivitsorusullugu.
Isumaqatigiissuteqarallarnikkut piumasaqaatit allanngussapput
Thule Air Basep ingerlanneqarnera aserfallatsaalineqarneralu 2014-imi nutaamik suliarinnittussassarsiuunneqarmat Greenland Contractors peqataavoq.
Amerikarmiut ingerlatsiviat Exelis suliarinnittussarsiuussinermi siullermik ajugaatinneqaraluarpoq, USA-mili eqqartuussivik (Court of Federal Claims) ukioq manna maajimi aalajangiivoq isumaqatigiissut Exilesimut tunniunneqarsinnaanngitsoq, taanna ingerlatsiviinnaammat Danmarkimi immikkoortoqarfik aningaasaateqanngitsoq.
– Tamanna tunngavigalugu US Air Force oqarsimavoq Greenland Contractorsimik isumaqatigiissutip tallineqarnissaa kissaatigalugu, isumaqatigiissut maanna atuuttoq 2015-imi septembarip 30-anni naappat isumaqatigiissutaagallartukkut, MT Højgaard allappoq.
Tamanna peqatigalugu selskabip oqaatigaa illua'tungeriinni isumaqatigiissuteqartoqarallassappat naatsorsuutigineqartoq tamanna pissasoq piumasaqaatit allanngortillugit.
– Maannangaarli nalilerneqarsinnaanngilaq tamanna suliffeqarfissuup aningaasarsiornikkut ineriartornissamik naatsorsuutigisaanut qanoq annertutigisumik sunniuteqassanersoq, selskabi nalunaarpoq.
Naalagaaffeqatigiinni nalunaarsortissimassaaq
Isumaqatigiissummi pineqarput Thulemi amerikarmiut sakkutooqarfianni inuinnaat sullissinermi suliassaat soorlu inissiat, aqquserngit, imermik pilersuineq, napparsimmavik sunngiffimmilu sammisaqartitsinerit.
Thulemi sakkutooqarfik pillugu USA-p naalagaaffeqatigiillu akornanni isumaqatigiissut malillugu sakkutooqarfimmi inuinnaat suliassaat taamaallaat selskabimit, naalagaaffeqatigiinni ingerlatsiviit nalunaarsorsimaffiini nalunaarsortissimasumit ingerlanneqarsinnaasut, nunat allamiut ingerlatsiviata immikkoortortaqarfianiunngitsoq.
Greenland Contractorsimi piginneqataassutit 67 procentii MT Højgaardip pigai 33 procentiilu namminersorlutik oqartussat pigalugit.