ukiumut naatsorsuutit
Great Greenland ukiut sisamat iluani aatsaat sinneqartoortoq
Great Greenland A/S 2016-mut 633.000 koruuninik sinneqartoorpoq, tamannali ingerlatsitseqatigiiffimmut ukiut sisamat iluani aatsaat sinneqartoorfiuvoq.
Ullumi sisamanngornermi Great Greenland A/S ataatsimeersuarpoq, tassani 2016-mut angusat saqqummiunneqarlutik.
633.000 koruunillu sinneqartoorutigineqarsimasut saqqummiunneqarpoq. Ingerlatsiteqatiggiiffik ukiut sisamat iluani aatsaat sinneqartoorteqarpoq.
Ilungersorsimaneq ullumi akilerneqartoq
- Ukiuni arlalinni amingaatooruteqartuarsimalluta, sinneqartooruteqarsimaneq saqqummissinnaallugu iluarisimaaqaara. Sulisut tamarmik ilungersorsimaqaat, nuanneqaarli ilungersorsimanitta immininut akilernera ullumi takussutissiarinera, pisortaaneq Ditte Sorknæs oqarpoq.
Atuaruk: Great Greenland tillinniarfigineqaqattaartoq
Great Greenland Naalakkersuisunit pigineqarpoq. Tamannalu pissutigalugu Naalakkersuisut siulittaasuat Kim Kielsen ataatsimeersuarnermi peqataavoq.
- Great Greenlandip ukiuni kingullerni suliniutigisimasaat ingerlatsitseqatigiiffiup sinneqartoorutinik saqqummiinera najuuffigisinnaangakku nuannaarutigaara. Piniarneq Nunatta oqaluttuarisaaneranut ilaavoq, suliffeqarfimmilli ataavartussamik pilersitsinikkut tapersersussavagut, Kim Kielsen oqarpoq.
Siulersuisut ingerlaqqittut
Ataatsimeersuarnermi siulersuisut tamarmik ingerlaqqipput, Helle Matthiesenilu siulittaasutut ingerlaqqippoq.
Siulersuisuni ilaasortat sinneri ukuupput Erik Sivertsen, Annette Kreiner, As Øland aamma Tommy Ege Kristensen.