Great Greenland Tivolimi tunisaqarluarpoq

– Takkuttunit nioqqutissaativut soqutigineqartorujussuusimapput, Great Greenlandimi sales manager Bente Nørkjær Knap Sermitsiaq.AG-mut oqarpoq.
Great Greenland nioqqutissiaminik assigiinngitsorpassuarnik Danmarkimut nassarsimavoq. Aaqqatit kulluinnallit, kavaajat, taskit aaqqatillu inuallit pisisartut soqutigaat.
– Nioqqutissaativut inuit soqutigisorujussuuvaat. Nioqqutissaativut saneqqukkaangamikkit attulaarusuttarpaat. Tamarmillu isumaqarput puisip amia attorlugu nuanneqisoq, Bente Nørkjælr Knap oqaluttuarpoq.
Taanna oqarpoq Tivolimi tunisat ilimagisamit amerlanerujussuusimasut.
– Aarhusimi ulluni sisamani ilusilersukkanik tuniniaavimmeeqqammerpugut, Aarhusimilu tunisatsitut maani Tivolimi ulloq ataaseq tunisavut amerlatigaat. Isumaqarpunga malugisinnaallugu puisit amii mutinngoriartoqqilersut, tassami tunisavut qaammatit tamaasa amerliartorput, Bente Nørkjær Knap oqarpoq.
Takornarianit ornigarneqaat
Taanna isumaqarpoq ullut ´Kalaallit Nunaat Tivolimi´ Kalaallit Nunaannut pitsaasumik sunniuteqassasut.
– Inuimmi Kalaallit Nunaanneersut kisimik takkunneq ajorput. Inuit nunanit assigiinngitsorpassuarneersut Tivolimiittarput, Bente Nørkjær Knap oqarpoq.
Great Greenland siusinnerusukkut ´Kalaallit Nunaat Tivolimi´-mi peqataasarsimavoq, aatsaalli siullermeersumik nioqqutissaataannarminik tuniniaalluni.
´Kalaallit Nunaat Tivolimi 2013´-imit allaaserisat assillu tamaasa takukkit
Aamma eqqaamakkit videokut inuulluaqqussuterpassuit videoliallu allat quppernerup nittartakkap saqqaata qulerpiaani