Great Greenland 1,8 millioninik amigartooruteqartoq

Great Greenland 2017-imi 1,8 millionit koruuninik amigartooruteqarpoq.

Glostrupimi quersuup tallimariarluni tillinniarfigineqarnikuunera aamma ataasiarluni tillinniariarfigineqarnikuunera tamatumunnga pisooqataavoq.

Tillinniarnermut toqqaannartumik aningaasartuutaasimasut 1 million koruunit pallippaat. Tassami Great Greenlandip nammineq sillimasiinermut 390.000 koruuninik akiliisimavoq, tamatumalu saniatigut quersuaq isumannaannerulersinniarlugu 683.000 koruunit atortariaqarsimavai.

Tillinniarnermi ataatsimi atisat katersat 2017-moortut tamarmik tillinneqarput. Tunisinermit isertitat amigaatigineqartut taakku 1 million koruunit qaavanut ilineqassapput.

- Saqqummersitat taakku tillinneqarsimanngikkaluarpata suliffeqarfimmut aningaasanik isertitsissutaasimasinnaagaluarput, Great Greenland tusagassiuutinut nalunaarummi allappoq.

Tillinniarnerit kisimik suliffeqarfimmut ilungersortitsinngillat. Puisip amiinik tunisinerit ukiut ingerlanerini ikileriarnikuupput, tamatumalu kinguneraa Great Greenlandip pisiumasunut malinnaasinnaajunnaarnera. Tamanna Nunatsinni niuerfimmi aamma Kopenhagen Fur aqqutigalugu tunisinermi atuuppoq. Ukiup siulianut sanilliullugu aamma Kopenhagen Furimi puisip amii 7.000-nik ikinnerusut tunineqarput, taamaalilluni puisip amii 21.000-t taamaallaat tunineqarput.

Ingerlatseqatigiiffiup taamaattumik sineriak tamakkerlugu puisit amiisa tunineqartut amerlineqarnissaat ukkatarissavaa.

Pitsaasumik aamma nutaarsiassaqarpoq. Puisip amiata agguaqatigiisillugu akia ukiup siulianit akisuneroqaaq, tassa 236 koruuneqarami.

Pitsaasumik ineriartornera ingerlaannarniarpasippoq. Juunimi akitsorterussinermi akia 500 koruunimiippoq.