inunnguuseralugu oqaatsit

Grand-prix-imi qallunaat oqaasii atorumanngilaat

Grand-prix-imi peqataasut tuluttut erinarsortarput ajugaanissaminnut periarfissartik annertusarniralugu. DR-p qallunaatut tuluttullu erinarsukkat piumavai

Tallimanngormat unnukkut Melodi Grand Prix 2014-imut sungiusartoqarpoq. Ukioq manna Odensemi ingerlanneqassaaq

Unnugu DR1-ikkut nalunaaqutaq 20 aallakaatinneqartumik Odense-mi melodi grand-priximi finalertut qulit pingaartumik tuluttut erinarsussapput.
Tassami erinarsuut ataasiinnaq ukioq manna Meldi Grand Prix-imi, Arena Fynimi ingerlanneqartussami, qallunaatuujuvoq. Erinarsuut qallunaatutu atorneqartussatuaq ´Vi finder hjem´ 16-iinnarnit ukiulimmit Emilie Moldow-imit atorneqassaaq.
2004-mi DR-p aalajangermaguli qallunaat melodi grand prix-ianni oqaatsit suulluunniit atorneqarsinnaasut, ukiuni kingullerni ukiut tamaasa qallunaatut erinarsugaq ataaseq marlulluunniit taamaallaat atorneqartarput.
Qallunaani nipilersortartuni pissutsit allaanerulluinnarput. Tamatumani qallunaat nipilersortartut qallunaatut erinarsortartut nuannarineqarluartarput.
– Piffissami kingullermi qallunaat nipilersorneranni pop qallunaatooq atugaallualersimavoq. Aamma nipilersoriaatsimi dancehall-imi qallunaat oqaasii atorneqarput, rap-imilu aamma qallunaat oqaasii atorneqarnerupput, Ole Rosenstand Svidt, Gaffa-mi webredaktøri oqarpoq.
Grand prix-imili atugassarisat allaanerulluinnarput, DR-mi nipilersukkanik immikkut ilisimasalik Henrik Milling oqarpoq.
– Erinarsortartut aalajangiukkaluttuinnarpaat ajugaanissaq pineqartoq. Taamaattumik annertunerusumik nunanut tamalaanut sammititsiniarnerulerput, taanna oqarpoq.
DR-mi aliikkutassaqartitsinermut pisortap Rasmus Ladefogedip erseqqissarpaa DR-p erinarsortartut tuluttut erinarsornissaannik kajumissaarneq ajorai.
– Qallunaatut tuluttullu erinarsukkat perusuppavut. Takoreersimavarpummi oqaatsit assigiinngitsut atorneqartut Europæiske Melodi Grand Prix-imi ajugaasartut. Tunngaviatigut erinarsuut pitsaalluinnartuussaaq, taanna oqarpoq.
Henrik Millingip tikkuarpaa erinarsuusiortunut erinarsuut qallunaatooq unammilligassaasinnaasoq.
– Qallunaatut erinarsuusioraanni iluatsitsilluartariaqarpoq tuluttut torrallatamik isumalimmik ateqartinnissaanut. Tamanna immikkut erinarsuusiortunut unammilligassaavoq, taanna oqarpoq.
Melodi Grand Prix-imi ajugaasoq Danmark sinnerlugu Europæiske Melodi Grand Prix-imi peqataassaaq, taannalu maajip 10-anni Københavnimi ingerlanneqassaaq, siorna qallunaaq Emmelie de Forest ajugaammat.

Powered by Labrador CMS