misigisassarsiorneq
Google Street View: Kalaallit Nunaanni sumiiffiit amerlanerusut takuneqarsinnaalissapput
Kalaallit Nunaat tamaat Google Street Viewikkut takuneqarsinnaanngilaq. Nunatsinni inoqarfiit sumiiffiillu aalajangersimasut Googlemit soqutigineqarput. Suut allat aamma saqqummiunneqarsinnaanerinut paasissutissanik katersisoqassaaq
Tasiilaq, Qaqortoq ,Narsaq, Narsarsuaq, Qassiarsuk, Tasiusaq (kujataaniittoq), Paamiut, Nuuk, Kapisillit, Ilulissat aamma Uummannaq.
Taakkuupput Google Street View aqqutigalugu nittartakkakkut takuneqarsinnaasut ullumimiit. Assilisat pilersinneqarsinnaanngorsimapput Asiap Visit Greenlandimik ataqatigiissaakkamik suleqateqarneratigut. Tassani Nunatsinni sumiiffiit 20-t assigiinngitsut assilineqarput.
Atortorissaarut 'trekker' atorlugu assiliinerit ingerlanneqarput, taanna assiliivik angallattagaq 15-inik assiliivittalik sammivinnillu tamanik assiliisinnaavoq.
Illoqarfiit nunaqarfiillu allat
- Googlemit nalunngilarput, ujaasinerit tallimaagaangata ujaasineq ataaseq atuisup sumiiffimmit nunap assinganik assilisanillu qimerluuineranik kinguneqartartoq, taamaattumillu Googlemik suleqateqarnissaq tulluartuusimalluni. Asiaq aamma Visit Greenland Kalaallit Nunaanni misissuiartorluni angalanissanik pilersaarutaasunik Street Viewimut atugassanik assiliiortornissamut atorluaasarsimapput, Asiameersoq Eva Mätzler oqarpoq.
- Nunatsinni sumiiffiit allat aamma assilineqassappat?
- Nunaqarfinnit, illup iluaneersunit aamma angalanissamut aqqutinik assinik saqqummiussisoqassaaq qaammatit arlaqanngitsut qaangiuppata. Kisianni inoqarfiit tamarmik assilineqarnissaat qularnarpoq. Asiaq tassani suliaqartussaavoq, suliaqarnerallu aningaasanut inatsimmi ilaassanngilaq. Aamma Googlep atortorissaarutit nunarsuarmi allani sumiiffinni atortussaavai, Asiamit Visit Greenlandimiillu oqaatigineqarpoq.
Google apeqqutaavoq
- Google Street View aqqutigalugu Kalaallit Nunaat tamaat assilineqassava?
- Naamik. Nuna isorartoorujussuuvoq. Inoqarfiit Googlemit soqutigineqarput assilineqarnissaat. Paasissutissat nammineq kajumissutsimik suliaqartunit allaniilluunniit suliarineqartussaapput.
- Assilineqartut ukiut tamaasa nutarterneqartassappat?
- Google tassani apeqqutaavoq.
- Google Street Viewikkut assilineqartut peerneqarsinnaaneri qinnutigineqarsinnaappat?
- Street Viewimi takuneqarsinnaavoq 'Rapporter et problem'. Tassani paasissutissanik peersiniarnermi qinnuteqartoqarsinnaavoq, Asiamit aamma Visit Greenlandimi oqarput.