Island Games
Golfertartut marluk Island Gamesinut
Golfertartut Lars-Karl Johansson aamma Simon Westmann, Nuumminngaanneersut, Nunarput sinnerlugu Island Gamesimi peqataassapput
Island Games juunip 24-niit 30-at ilanngullugu ingerlanneqalerpata, Nunatsinneersut golfertartut marluk peqataassapput.
Golfertartut inuusuttut pikkorissut Lars-Karl Johansson aamma Simon Westmann, tamarmik Nuumminngaanneersut, Gotlandimi ukioq manna Island Gamesimik aaqqissuisuusut, Nunarput sinnerlugu unammeqataassapput, Nuummi Golfklubbi nalunaarummini paasissutissiivoq.
Ukiut allortarlugit timersortartut nunarsuarmit tamanit qeqertanit 24-ineersut timersuutit 13-it assigiinngitsut ingerlallugit unammiuaartarput.
2003-mi golfertartut pingasut Nuuk Golfklubimeersut siullermeerlutik Island Games Bermudami aaqqissuunneqarmat peqataapput. Tamatuma kingorna 2015-imi Tuluit Nunaata qeqertaasa ilaanni Jerseyimi aamma Nunatsinnit golfertartut pingasut peqataapput, tassaasut Lars-Karl Johansson, Jan Rasmussen aamma Rasmus Nyvold.