GOG-mi kalaallit sisamanik isertitsipput

Arfininngormat ualikkut TV-kut aallakaatinneqartumik BSV-p GOG-llu Silkeborgimi Jysk Arenami ulikkaavissumi unammineranni angerlarsimaffimminni unammisut ilimagineqarluinnarsimapput. 1. division-imilli qaffariareerluni GOG holdiuvoq Håndboldligami kakkannerit mianersuuttariaqagaat.
Tamannalu BSV-p paasivaa. GOG-mi unammisartut inuusuttut unamminerup immikkoortuani siullermi arsarluartorujussuupput muminnermilu 13-18-imik siuarsimallutik. Ilimagineqartut BSV piffissap ilaani arsarnerloqaat, GOG-milu Snorri Gudjónsson siuttuliulugu ajugaanissaq ilimanarsigaluarpoq.
Naluneqanngitsutut orpiit qilammut apuullutik naaneq ajorput, tamannalu muminnerup kingorna GOG.p malugaa. BSV minutsini 30-ni kingullerni piumassuseqarnerujussuulluni ajugaanissanilu upperalugu unammivoq.
Angerlarsimaffimminni arsartut aningaasaateqarluartut pissartanngornissamillu anguniagaqartut unamminermut iseqqipput. MInutsit qulit sinneruttut 20-20-mut isertitsipput. GOG-ili tunniutiinnanngilaq, minutsinilu kingullerni qulini arlaleriarluni ajuunnernik marlunnik siuartarluni. Unammineq pissanganartorujussuarmik naggaserneqareersoq 30-30-mik inerneqarpoq.
Minik Dahl Høegh pingasunik Akutaaneq Kreutzmannilu ataatsimik isertitsipput.

Nuannaarpoq pakatsilaarlunilu
GOG-p sungiusaasua Jakob Larsen unamminerup kingorna assigiinngitsunik misigissuseqarpoq. Sermitiaq.AG-mut Jakob Larsen oqarpoq:
– Soorunami ataatsimik pointinnakkatta nuannaarutigaara. Eqqaamassavarput akerarput BSV ukiorpassuarni aningaasarpassuarnik atugaqarsimasoq siuttunut peqataajumalluni. Aappaatdigut muminnermi ajuunnernik tallimanik siuarsimavugut, arsartartukkalu minutsini 60-ini tamani piffissap ilarujussua arsarluartarput tamaviaarlutillu. Tamanna tunuliaqutaralugu ajugaasinnaasimagaluarpugut. Taamatut BSV aamma oqarsinnaalluarpoq, tassa sekundit kingulliit arsaariarluta ajugaassutissaminnik isertitsisinnaagaluaramik.
Arfininngornermi unamminerup kingorna GOG Håndboldliga-mi normu 5-iuvoq qulingiluanik pointeqarluni.