håndbold
GOG-ip sungiusaasua: Bronzenanniunnermi Andreas Holst ajoquseqqagami peqataasinnaanngilaq
Assammik arsarluni DM-semifinalimi ajorsarnerup kingorna bronzenanniunnissami GOG-imi unammisartoq piginnaasaqarluartoq Andreas Holst peqataasinnaanngilaq
GOG DM-finalimut anngutinngitsoorpoq, arfininngormat ualikkut Team Tvis Holstebromut ajorsarami.
Seeqquni pillutsippaa
Semifinalimi unamminerup aappassaa aallartiinnangajattoq GOG-p piginnaaneqarluartoq 21-inik ukiulik Andreas Holst anisittariaqarpaa. Sakkortuumik sakanneqarluni seeqquni pillutsippaa unamminerullu sinnera peqataasinnaajunnaarluni.
Sungiusaasuuneq Jakob Larsenip naapertorlugu qanoq ajoqusertigisimanersoq suli nalunarpoq.
– Sapaatiuppat scannerneqareertinnagu tamanna oqaatigiuminaappoq. Maannakkorpiaq niua sukassimangaarmat suunersoq tamakkiisumik oqaatigisinnaanngilarput. Ilimanarpoq meniskimigut ajoqusersimavoq, scannertinnaguli oqaatigineqarsinnaanngilaq, unamminerup kingorna sungiusaasoq oqarpoq.
Peqataasinnaanngilaq
Jakob Larsenip oqaluttuarpoq bronzenanniunnermi backi inuusuttoq peqataasinnaanngitsoq.
– Andreas Holsrt unammeqataasinnaanngilaq. Unammineqataasinnaanersoq qularnartorujussuuvoq. Pingasunngornermut piareereersimanissaanit apeqqutaaneruvoq qaammatit qassit peqassannginnersoq, taanna oqarpoq.
Allat unammisrfianni
Semifinalit aappaani GOG allat unammisarfianni unammivoq, Team Tvis Holstebrolu unamminermi qularnaatsumik 30 - 25-imik ajugaavoq. Unamminermi siullermi GOG Gudmemi 27 - 28-imik ajorsarmat Team Tvis Holstebro ajuunnernik ktaillugit arfinilinnik amerlanerusunik isertitsilluni ajugaavoq.
Bronzenanniunnissaq
Taamaattumik GOG-p bronzenanniunnissami Bjerringbro-Silkeborgip )(BSV) aamma KIF Kolding Københavnip unamminerannit ajorsartoq unammissavaa, taakkualu semifinalimi aappassaanik unamminerat pissaaq sapaatiuppat.
Teknikkikkut kukkunerit
Arfininngormat unamminermi Tvis Holstebromeersut sukalanerupput, muminnermilu 19-23-mik siuarsimallutik. Taamaasilluni muminnermi GOG ajorsapajaareerpoq.
– Unamminerup immikkoortuani siullermi arsarnerloqaagut iluamillu aallartinngisaannarluta. Teknikkikkut kukkunivut kisissaanngingajapput. Aamma akeqqavut arsarluaqigamik, qeqqani assersuisuvut backivullu sapersartittarlugit, Jakob Larsen oqarpoq.
2010-mi akiliisinnaajunnaartoq
Fynimeersoq GOG 2010-mi akiliisinnaajunnaarpoq, holdilu 2013-imi kakkannerpaanut uteqqimmat siumuinnavik ingerlasimavoq.
– Pingaaruteqartorujussuuvoq oqarsinnaagatta Danmarkimi assammik arsartartunut pitsaanerpaanut uteqqissimasugut. Slutspilimi ingerlalluarsimavugut. Pikkunaakujuppoq maani unamminerup immikkoortuani siullermi taama sapersartinneqartigigatta.
– Kingumulli qiviarluni isigigaanni aamma ajunngilaq holdimut grundspillimi taama ajugaalluartigisimasumut ajorsaratta. Taamaattumik piginnaasavut nassaareqqipallassavagut pingasunngorpallu unammilluarluta, ilami ajugaarusoqigatta, Jakob Larsen oqarpoq.