Kuannersuit
GME-p isumaqatigiissut Naalakkersuisoqarfimmut tunniukkumanngilaa
Namminersorlutik Oqartussat takusinnaanngilaat kiinamiut ingerlatsiviata Shenghep GME-mi piginneqatigiissutit 60 procentiinik tigusisinnaaneranut qanorpiaq isumaqatigiissuteqartoqarsimanersoq
Kiinamiut ingerlatsiviannik Shenghe-mik isumaqatigiissut GME-p Aatsitassanut Naalakkersuisoqarfimmut tunniukkumanngilaa.
Tamanna takuneqarsinnaavoq takunnissinnaanermut qinnuteqaammi Sermitsiamut akuersissutigineqarsimasumi.
Naalakkersuisoqarfik isumaqatigiissutip takunissaanik qinnuteqarpoq, saqqummiunneqarmat Shenghep Kuannersuarni suliniummi piginneqartigiissutit 60 procentiinik tigusisinnaanissaminut periarfissinneqarsimasoq.
Aallaqqaammut GME-p John Mair telefonikkut nassuiaateqarsimavoq.
Nassuiaat amigaatigaa
Ersaripporli Naalakkersuisoqarfiup telefonikkut nassuiaateqarneq naammagivinngikkaa.
Qinnuteqaqqippoq isumaqatigiissut nammineq takorusullugu, paaserusukkamiuk piginneqatigiissutinik amerlanerusunik pisinissamut neriorsuuteqartoqarsimappat tassani qanoq allassimasoqarnersoq.
GME-p isumaqatigiissut tunniukkumanngilaa, innersuussutigalugu isumaqatigiissut allanut isertugaasoq.
– Isumaqatigiissutit taamattut isertuunneqartarnerat niuernermi nalinginnaasumik atugaavoq, John Mair allappoq.
Namminersorlutik Oqartussat tatiginngilai
Tamanna peqatigalugu erseqqissarpaa isumaqatigiissutip tunniukkumannginneranut pingaarnerusutut pissutaasoq upperinnginnamiuk naalakkersuisoqarfiup isumaqatigiissut isertuussinnaagaa.
– Kalaallit naalakkersuisuisa allagaatinik attatiinnarlugit illersorlugillu isertuussisinnaanerat upperivallaanngilarput, australiami inatsit naapertorlugu allagaatit tamakkua nammineq pigineqaannassammata GME-lu Shenghellu akornanni isertuussaallutik.
Naalakkersuisoqarfik akivoq qanittukkut uterfigeqqissallugu.
Pisimasup ingerlarnga tamaat Sermitsiami atuaruk.