Kuannersuit
GME-p aktiai qaffarujussuarput
Kuannersuarni uranimik aatsitassanillu qaqutigoortunik piianissaq aningaasaliisartunik upperineqartoq
Greenland Minerals and Energyp ukioq manna aktiai qaffarujussuarput. Australiamiut nittartakkatigut tusagassiisarfia proactivinvestors taama allagaqarpoq.
Nittartakkami takuneqarsinnaavoq aktiat januarimi 88 procentinik qaffariarsimasut. Australiami niueqatigiittarfimmi ASX-imi qaffariaqqissimavoq, ippassaq aktiat nalinga 0,15 qaqisimallugu. Ukiup aallartinnerani aktiat nalinga 0,06-imiissimavoq.
Aktiallu nalingata qaffakkiartupiloorneranut Kuannersuarni aatsitassarsiornerup upperineqarnera pissutaavoq. Kuannersuarni nalunnginneqartutut uranimi aatsitassanillu qaqutigoortunik piiasoqartussaavoq.
Shenghe GME-p aktiaataanik pisivoq
Aktiat nalingata qaffanneranut peqqutaaqataavoq ukiarmi GME-p kinamiut suliffeqarfiutaat Shenge isumaqatigiissuteqarfigineqarmat.
Shenge-p GME-p aktianik 12,5 procentinik piginneqataalerpoq, aktiallu nalinga 0.037-mik naleqartilerlugu.
Atuaruk: Kiinamiut GME-mik tigusinissaat akuersissummik pisariaqartitsivoq
Shenge GME-p aktiat 60 procentii pisiarinissaanut periarfissinneqarpoq, GME-llu decemberip qaammataanni ataatsimeersuarnerminni nioqatigiinneq akuerineqaraat.
Nalilersuinerat akuerineqanngilaq
GME-li piiaasinnaanermut akuersissummik qinnuteqarnissartik sulissutigaat. Manna tikkillugu GME-p piiaanissamut nalilersuititsinera (VVM) aatsitassalerinermut oqartussaasunit naammagineqarsimanngilaq.
Atuaruk: Naalakkersuisoqatigiit uran pillugu apeqqut pinngitsoorsinnaavaat
Qinnuteqaatilli tusarniaavigineqarnissaanut nassiutinnginnerani GME VVM-imut nalunaarusiamut paasissutissanik annertunerusunik pissarserusupput.