GME-mit avatangiisinut nalunaarusiaq: Annikitsuinnarmik qinngornermik ulorianartorsiortitsissaaq
Kuannersuarni qinngornernik ulorianartunik akulinnik kingunerisassat qummut killissap ataaniitinneqassapput, VVM-mik nalunaarusiap, GME-p tunniussaata tamanna takutippaa. KNR taama allaaserisaqarpoq.
Kuannersuarni aatsitassanik qaqutigoortunik uranimillu piiaaffimmi qinngornerit ulorianartunik akullit annikitsuinnarmik qaffariassapput. GME-p avatangiisinut sunniutissanut kingunerisassat pillugit nalunaarusiami Namminersorlutik Oqartussanut tunniuteqqammisaata tamanna takutippaa, KNR taama allaaserisaqarpoq.
Piffimmi qinngornernik ulorianartunik akulinnik peqareerpoq – ingammik gassi radon saffiugassarlu radium, kiisalu pujoralak piiavimmit ammaannartumeersoq pissutaallutik, KNR-ip allaaserinninnera naapertorlugu nalunaarusiami tamanna allaqqavoq.
Kinguneqartitsinissaali ataatsimut isigigaanni Nunarsuaq tamakkerlugu atomip atorneranut nakkutilliisoqarfimmit aalajangersarneqartunik qummut killigitanik qaangiinavianngilaq.
Aammattaaq kingunerlutsitsisinnaasumik naleqqutinngitsumik aniasoortoqarneranik kinguneqarsinnaaneranut annikitsuinnarmik aarlerinaateqartoq nalilerneqarpoq.