assammik arsarnermi GM

GM: Pissanganartumik unammisut naligiiginnartut

Assammik arsarluni Kalaallit Nunaanni pissartanngorniunnermi sisamanngormat arfinileriarluni unammisoqarpoq. Unammineq ataaseq sivisuumik eqqaamaneqajunnarsivoq

Qaanaamit QNQ aamma GSS angutini sisamanngormat unammisut

Iluliarmiut Nagdlúnguak aamma Aasiammiut Norsaq HC angutimi unammimmata sukataaginnavipput, unamminermi isertitsinerpassuupput anisitaasoqarlunilu.

Unammineq naammassineqarmat unammisut naligiiginnarput.

Norsap kukkuluttornera
Unammineq naammassiliivissoq Norsaq HC isertitamik ataatsimik siuaqqavoq arsarlu paaralugu. Kukkusoqareerneratigulli Nagdlúnguak saassussivoq isertitsillunilu. Taamaasilluni unammisut tamarmik 34-raartillugit.

Pissartanngorniunnermi kikkut GSS-imut unammissanersut taamaasilluni suli oqaatigineqarsinnaanngilaq. Nagdlúnguup unamminini tullinnguuttut marluk ajugaaffigisariaqarpaat. Norsaq HC-ip neriuutigissavaa isertitanik amerlanernik isertitaqarnissartik.

Nagdlúnguak' sisamanngornermi SAK-mut Sisimiuneersunut unammissapput. Norsaq HC marloriarluni unammissaaq, siullermik Narsameersut N-85 tullianilu GSS.

Norsaq HC-ip isertitaat isertitanik 43-nik nikingassuteqarput, Nagdlúnguup isertitai 28-nik nikingassuteqartut.

Arnani GSS aamma NÛK pissartanngorniunnissaat qularutigineqarpallaanngilaq. GSS Nuummioqatiminnut unammersuarnermi ajugaasareerput, unamminernili allani suli ajorsartinneqanngillat.

Sisamanngornermi unamminerit:
Angutit

  • Nagdlúnguak' - Norsaq HC: 34-34. toqqarneqartoq: Mikkel Ostermann, Norsaq HC
  • QNQ - GSS: 16-50. toqqarneqartoq: Miilu Rosing, GSS
  • NÛK - SAK: 31-13. toqqarneqartoq: Tatsiaq Bohm Villadsen, NÛK

Arnat:

  • Kâgssagssuk - Nagdlúnguak ́: 28-32. toqqarneqartoq: Tuuta Skifte Heilmann
  • NÛK - Norsaq HC: 45-12. toqqarneqartoq: Katinka Zeeb, NÛK
  • GSS - SAK: 35-22. toqqarneqartoq: Pilunnguaq S. Gaurus, GSS

Tallimanngornermi unammisussat:

Angutit:

  • Kl. 13.00: N-85 - Norsaq HC
  • Kl. 16.00: QNQ - NÛK
  • Kl. 19.00: Nagdlúnguak' - SAK
  • Kl. 20.30: GSS - Norsaq HC

Arnat:

  • Kl. 14.40: Norsaq HC - Kâgssagssuk
  • Kl. 17.30: SAK - Nagdlúnguak ́

Unamminerit tamarmik Inussivimmi ingerlanneqassapput.

Powered by Labrador CMS