GM-imi unamminerni isertitsinerpassuit
Angutit isikkamik arsaallutik pissartanngorniunnerat sapaatiummat aallartinneqarpoq. Sisamariarluni unammisoqarnerani 31-nik isertitsisoqarpoq
Isikkamik arsaallutik Kalaallit Nunaanni pissartanngorniunneq ippassaq sapaatiummat aallartinneqarpoq.
Pissartanngorniunneq Nuummi ingerlanneqarpoq, unamminernilu siullerni sisamaasuni isertitsinerpassuaqarpoq, tassami isertitsinerit katillugit 31-upput.
Nuummit NÛK aamma UB-83 Upernavimmit unammeqqaartuupput. Tassani NÛK 3-2-mik ajugaavoq, naak UB-83 unamminerup ingerlanerani 1-2-mik siuaqqasimagaluartoq.
Unamminerup aappaani G-44, Qeqertarsuaq, aamma ukioq kingulleq silvinnattut B-67, Nuuk, unammipput. Unammineq pissanganarsinngitsoorpoq, tassami B-67 10-1-mik ajugaagami.
Ullormi unammiffiusumi unammineq pissanganarnerpaami Kugsak Qasigiannguanit aamma Kagssagssuk Maniitsumeersut unammipput. Unamminerup immikkoortuata aappaani Kugsak 3-1-mik siuaqqagaluarpoq, Kagssagsummili unammisartut akiuullualaavipput. Unammineq naammassimmat Kagssagssuk tallimanik isertitaqarluni ajugaavoq Kugsak pingasunik isertitaqartoq.
Unamminermi kingullermi ukioq kingulleq pissartaasut IT-79 aamma Qaqortumit K-33 unammipput. Tassani IT-79 7-0-mik ajugaavoq.
Ataasinngornermi unamminerit:
Pulje A:
- Nal. 13.30: UB-83 - Kugsak
- Nal. 17.30: NÛK - N-48
Pulje B:
- Nal. 15.30: G-44 - Eqaluk 54
- Nal. 19.30: B-67 - IT-79