GM aallartilerpoq: Ajugaasussatut ilimagineqartut ukuupput
Angutit arsaallutik pissartanngorniunnerat sapaatiuppat aallartinneqassaaq. Pissartanngorniunneq Nuummi ingerlanneqassaaq
Isikkamik arsaalluni pissartanngorniunneq sapaatiuppat aallartinneqassaaq, tassani timersoqatigiiffiit qulit peqataassapput.
KNR Radio-mi timersornermi radiukkut aallakaatitsisartoq Finn Nielsen Sermitsiaq.AG-mit GM-ertoqarnissaa pillugu oqaluunneqarpoq. Timersoqatigiiffiit pingasut timersoqatigiiffinnit allanit malunnaatilimmik pikkorinnerusut oqaatigaa.
- B-67-ip pissartanngornissaa ilimanarnerpaavoq, kisianni IT-79 aamma Nagdlunnguak' akiuuteriaannaapput. Pissartanngorniunnerni susoqarsinnaasarmalluunniit tupaallatititsisoqariataarsinnaavoq, Finn Nielsen Sermitsiaq.AG-mut oqarpoq.
Nagdlunguak' Pulje A-mit ingerlaqqinnissaa qularutissaanngitsoq oqaatigaa.
- Timersoqatigiiffiit allat ingerlaqqinnissamut periarfissaqartut oqaatigisinnaavara. Puljep aappaani B-67 aamma IT-79 ingerlaqqinnissaat ilimanartorujussuuvoq, oqarpoq.
- GM-ertoqarnerani kikkut maluginiarneqassappat?
- B-67-imit Ari Hermann. Sukkasoorujussuuvoq unammisaallu unitsikkuminaatsittartorujussuuaat. Arsarluarpat B-67 GM-ertoqarnerani angusarissaarluassaaq. Marlulissat Nagdlunguamit Nick aamma Lars-Erik Reimer aamma maluginiarneqarluassapput, akivoq.
Ivigaasanik arsaattarfeqalersimanera Finn Nielsenip nuannaarutigaa.
- Unamminerit isiginnaassallugit taamaasilluni soqutiginarnerulerput. Arsaattut arsaq aqulluarsinnaaneruaat tunioraannerillu pitsaanerulernikuullutik. Sioqqani unammisarallarmata unammiffilunnera pissutaalluni naatsorsuutiginngisanik pisoqariataartarnikuuvoq, tamannali qujanartumik qaangiuppoq. Unammisartut unammiffitsik sungiutipallakkiartoraat malunnarpoq.
- Arsaanneq ineriartorluarpoq, tassani futsalip aallulluarneqarnera aamma patsisaasinnaavoq. Ukioq kaajallallugu sungiusartoqartarpoq, tamannalu silami unamminerni takuneqarsinnaasarpoq, tassami unammisartut sukkanerullutillu qasujaannerulernikuupput, Finn Nielsen oqarpoq.