Gimmick: Erfalasorput nutaaq?

– Immaqa nunami maani nutaamik erfalasortaarnissarput isumaliutigisariaqarparput? Iran-imut, Nordkoreamut il.il. takutinniaannarlugu uranimik maani pisisinnaasut.
Tamanna innuttaasunut taasissutigitillugu? Ila sooq?! Tamanna inuit qinigaasa paasisimannittut aalajangigassaraat.
Aalajangiinerup aqaguani Nuummiu Malik Milfeldt allappoq, Photoshop-ilu atorlugu Erfalasorput allanngortillugu sanasimavaa.
Malik Milfeldt Sermitsiaq.AG-mut itisiliivoq:
– Piffissami kingullermi uranimut akuersaanngilluinnarnerup atorunnaarsinneqarnissaa oqallisigineqartorujussuusimavoq, ersarivissumillu amerlasuut akuersaanngilluinnarnerup atorunnaarsinneqarnissaa akerleraat aalajangiisartunullu inassutigalugu apeqqut taama pingaaruteqartigisoq - ulumikkut uagutsinnuinnaanngitsoq, aammattaarli kinguaassatsinnut - innuttaasunut taasissutigiteqqullugu.
– Tamanna Naalakkersuisut soqutiginngilaat, ippassarlu amerlanerussuteqalaaginnarlutik akuersaanngilluinnarneq atorunnaarsillugu.
Erfalasorput tusangiasaarutigalugu
– Isumaqarpunga tamat oqartussaaqataanerannut ajornartorsiutaasoq uagut maani najugaqartugut tusaaniarneqannginnatta. soorunamilu assersuutigalugu inuit naapittarfii innuttaasut tamarmiusut isumaannik takunniffiusinnaanngikkaluartut, taava naapittarfinni soorlu Facebook-imi Twitterimilu ulluni makkunani oqaaseqaateqartorpassuaqarpoq, inuillu oqartarlutik pakatsisimasorujussuullutik aalajangigassaq taama pingaaruteqartigisoq inunnit 15-init, innuttaasut taasisinnaasut saneqqutiinnarlugit, aalajangerneqarmat.
– Tamanna Efalasumik tusangiasaarutiginiarsaraara, taamaattumik aalajangiinermut oqaaseqaataavoq, imaanngitsoq Erfalasorput kulturikkut takussutissatullu taama pingaaruteqartigisoq illaruaatiginiarlugu. Tamannami mitaatiginninnerungajassagaluarpoq, Malik Milfeldt nassuiaavoq.
Urani pilugu allaaserisarpassuit atuakkit uani